حـبـيـب الـعـازمـي
الوقت يسرق شاعر الميدان والساعه تدور
والشاعر الي مادرى يرجع يوقت ساعتـه
ولعمله اللي من ذهب وسط الخزينه ماتبور
لكن مابه تاجـرن يقـدر يـذم ابضاعتـه
فـيـحـان الـقـعـيـانـي
حنا ترانـا ياحبيـب ماجهلنـا فالامـور
الله يوفقنا ورب البيـت نرجـي طاعتـه
والعمله الي ماتخارج مع وسيعين الصدور
لن شالها التاجر على اذنه خربت سماعته
حـبـيـب الـعـازمـي
الخط ملكن للمسافر والاشـاره للمـرور
والسايق الي مامعه رخصه يموت ابراعته
الله يعين اللي على الدنيا ومافيها صبـور
ولخير من زراعته والشر مـن دراعتـه
فـيـحـان الـقـعـيـانـي
أنا معي رخصه وجاهز ياحبيب للعبـور
لاتحسبني ورع يبغى الخير من رضاعته
اثرك مثل الملح يوم اتنوشه الشعله يثور
والملح ماهو زين نوب ايثور في صناعته
حـبـيـب الـعـازمـي
اللولو والمرجان ماتلقاه في كل البحـور
مار أنت تسبح في علو البحر ولاقاعتـه
فيحان من باب التهكم والتغطرس والغرور
يضحك بغيره والنهايه ضاعته واضاعتـه
فـيـحـان الـقـعـيـانـي
انته تبي سطح القمر والارض من تحتك تدور
ولد الخواجه يحسبـن الفكـر فـي قباعتـه
أنا معلم ياحبيـب وانـت خابـر ومخبـور
والخير لاهل الخير ولا الشر فـي طماعتـه
حـبـيـب الـعـازمـي
ياجاهلين الاخره ترى بدايتها القبـور
وبليس مايقدر يقدم عذر عن تباعتـه
وانته بعد مخبور دايم يمنا سيلك حدور
والعلم كان الي يولع تحرقـه ولاعتـه
فـيـحـان الـقـعـيـانـي
الجهل ظلمى موحشه والعلم لاهل العلم نور
واللي يطيع الناس في بعض المثل ماطاعته
أنا مع العتبان طيب وانت يابـدر البـدور
تكسف على العالم ليا شافوك في مطلاعته
حـبـيـب الـعـازمـي
انته على راس العمل ولا على بند الاجور
ولا قـرارك مايكلفنـا ياكـود اطباعتـه
ياصحيبنا الي من قديم الوقت دمك لايفور
والشر مايبلابه الا مـن حـدى فراعتـه
فـيـحـان الـقـعـيـانـي
ياريس المركز على هونك ترى الدنيا تجور
راع المقبس لو يزهبها تطيـح اسراعتـه