[عبدالله الحميدي]

عبدالله نافع
مرحبا بعودتك وشكرا لك الى مالانهاية ..
***
عبدالله الحميدي هواس الخياري
معلم بمدارس الحرس الوطني بالرياض
28 سنه
متزوج
وهذي الاشياء الاساسية :)
****
بالشعر الفصيح كانت بداية الظهور امام الناس كشاعر وكان ذلك ايام الصف الثاني المتوسط اثناء مسابقة بادارة تعليم تبوك والحمد لله حصلت على المركز الثاني على مستوى المنطقه , واصلت الكتابه لكن كنت اميل بشده للشعر الشعبي واكتبه لانه قريب منا مقارنة بالشعر الفصيح واساسا حنا مجتمع شعبي , بعدها قدمني الشاعر الكبير مساعد الرشيدي بأمسية له بحفل للشيخ حباس انا واحد اصدقائي بنفس عمري تقريباً , وكنا صغار بوقتها واتذكر ابو فيصل شجعنا وكرمنا بجوائز نقدية بنهاية الحفل كتشجيع لنا , بعده صرت اشوف نفسي كشاعر شعبي وخصوصا حسيت بالاحتفاء من الناس .
****
علاقاتي بشعراء الساحه واسعة خصوصا الجميلين شعرا وخلقا افتخر كثيرا بـ( مساعد وسعد علوش وسعد زبن ومحمد المويزري وناصر مرسال وفهد المساعد ومحمد الغرير ومحمد بن ساقان واحمد البلوي وتركي حمدان وصالح السكيبي وصالح السهلي وعبدالله الراشد ومحمد الراشد والكثير مايحضرني) وافتخر بهم كرجال انقياء قبل كل شيء ..
وهناك الكثير من اصدقائي لاعلاقة لهم بالشعر ولايتابعونه اساساً , ليس شرطا بمعرفتي وصداقتي لشخص ان يكون شاعر لاني انا شاعر ..
****
والله شعراء القبيلة المبدعين كثير انا يطربني على سبيل المثال لا الحصر ( مساعد وعيد بن مربح ومحمد المويزري وناصر مرسال وعبدالله الراشد وثامر شبيب وزعل الرشيدي وسعدان عابس شفاه الله وعقيل علي الفريدسي والشاعر حامد زيدان اللي مدري وين اختفى ومحمد جفال الخياري وعبدالعزيز مسعود الخياري ) واسماء كثيره لكن هذا اللي يحضرني والا فيه كثيرين مبدعين جداً
****
عدم بروز شعراء القبيله :
اعتقد بالشعر النبطي الكثير بارزين ومعروفين بالساحه كمبدعين , لكن بمجال المحاورة اقل بروزاً بكثير , اعتقد ان عدم الدعم الاعلامي لهم بحفلات منقوله قد يكون سبب , خصوصا ان هذا المجال يتطلب دعم من هذا النوع , ايضا شعراء المحاورة الشباب ربما عليهم جزء كبير لانهم لابد ان يتعلموا ممن سبقهم من شعراء القبيله قبلهم ممن يملكون الخبره ولاينظروا للمسأله بأنها تنافس بقدر ماهي تعلم وممارسه.
****
اقرب اصدقائي:
كثير قريبن لكن ممكن عبدالله الراشد ومحمد الغرير
****
امنيتي :
عندي امنيات كثيرة والله
*
شاعر اتمنى ان التقيه :
الامير بدر بن عبدالمحسن
****
شاعر لاامل الجلوس معه :
اكثر من واحد والله.
****
شاعر احب الاستماع لقصائده :
تميم البرغوثي
*
شاعر يذهلني :
أي شاعر يكتب شي مانكتب قبله.
.
***************************
القصائد التي طلبت :
.
.
يمّ السما نظرتي والشوف متفرّق
مثلي مثل كلّ واحد .. ضايعاً طيره
آنا الوحيد / اللّي إختار اللّي ابـيعشق
لكنّي ماخترت إنّي مآ عشق غيره
الحالي, المايق, الرايق, ابو ازرق
فديت لبسه... ابنقشاته وازاريره
شفّاف , حبّوب .. حتّى بالقسى /يشفق
غيور .. واتشفّف ابسكتاته الغيره
وايحبّه الكلّ..لو يخطي / معاه الحق
كنّه هو اللّي يحدّد كثر تقديره
يحسّ بإحساسي اللّي فيه متعلّق
لو انوي اكذب عليه .. إحساسه ايثيره
القاه لاخطيت متقعّد لي ايدقّق
وايتمّ شرهان .. عاصيته تعابيره
يبكي على ادناة ضيقه .. لين مايشهق
لاضاق تعجز عن الكتمان اساريره
رسمته ابصوتي لو ملامحه تغرق
واحرقت نفسي ونار اقفايته حيره
كل شيْ منّي يحبّه .. صار متوهق
وكل مابعقلي عشق كل مابتفكيره
اليوم/ كلّي بوصله ماني موفّق
وهو مسمّيني امس/ اجمل مقاديره
فارقني اليوم واوّل وحشته تحرق
وإن قيل / خيره .. ماظن مفارقه خيره
إتصدّق للحين ماني قادر آصدّق
يكذب فراقه .. ولو تصدق معاذيره
له حق/ لو يزعل .. ومع حق/لو يرفق
لاهو نساني .. ولا يحتاج تذكيره
ولاتلومني بالسما الليله ..والارض اضيق
ياخي تضايقت .. تكفى غيّر السيره
ابي وصال ابو ضحك الخاطر الاروق
مثل الكريم اللّي ايداري مساييره
ابو الجبين اللّي كلْ مايستحي يعرق
وايسيل ويصير لونه في تحميره
مابالجميع بغيابه واحداً يفرق
الكلّ .. متساوياً ضحكه وتكشيره
لايفوتك الحزن ..يالشامت تعال الحق
الفرقا الاولى ..واخاف تكون الاخيره
ماعندي اسرار ..ليه ؟ .. انا ماجيت اسرق
هو باقياً لي مزاج اخاف تعكيره !
كنّي ضميت ومعي ما .. وإن شربت/ اشرق
اصعب مابالحزن / مايعجزك تعبيره
والشوق على اوله مايهرج وينطق
اصدّ وجهي .. وإذا نسّم هوى .. ايديره
للّي انا اخترت يوم إني نويت اعشق
لانّي ما اخترت إني مآ عشق غيره
.
***
القصيدة الثانية :

كلّ الزمن لاصار ماعندك احساس
زمان حساسين.. مالك دخل فيه !
اللي يحقر الناس/ ماهو ولد ناس
وقليل شوف ونظرته ماتقديه
يطيح من كبّر على نفسه الراس
الراس لامنه كبر طشّ راعيه!
سلم على اللي يعتبر عقله لباس
ويلبس على قدة لباس يكفيه
من كبر لباسه صغر فيه وإنحاس
يكتف يديه وتنعثر فيه رجليه
وياصاحبي حشاك لاصرت نبراس
للطيب حاويك ابمعزه وتحويه
ماغرتك نفسك عزيزٍ على ساس
ساسك سمو وعزتك من معاليه
مايوم كنت بوجهك السمح عباس
ولك الرضا في كل وجهٍ تلاقيه
تسطى لدوس الذل والصعب والياس
في كل درب راحت خطاك تمشيه
كأن قو الباس/ ماء ..مالقى كاس
وانصب بعروقك وصارن سواقيه
وانا بليا فخر جهل وتغطراس
من قوم اتشرّه وتدرا المشاريه
رجالنا لامن عطى ينسى الافلاس
حتى اللي مايعطي ليا جاه يعطيه
من طيبنا نطيب حتى بالانجاس
ولا نطلب الا الله جزى مانسويه
قوم ما طرشنا مدور وعساس
يدلنا بالعز والا أبمواريه
العز فينا كننا/ كلنا اجناس
عز الطفل يولد معه كنه/ أيديه
وعذري لك افخر فيه ورضاك نوماس
لك من صديقٍ يحشمك وانت تغليه
وكل عذر لك ببدايته كان وسواس
بوسادتي قبل اتغفي عيني اوحيه
وايجيك مني كل ماهب نسناس
وعذر مايرضي قلبك الله لايثنيه
عساه يدمح لي خطاي إنني حاس
وإني شريتك/ واللي يشريك تشريه
زليت في حكيي وكنت انت حساس
وفهمته إنت بقصد ماكنت انا اعنيه
ليت اللسان اليا زهف عنده اجراس
يدقهن وايصج سمعك لاتوحيه
وان ماقبلت العذر عاتب ولاباس
قلبك مايجهل قلبي بكل مافيه
انا رجل/ مانيب جاهل وبلاس
ومانيب ثرثار/ مايسمعه يحكيه
وكثر التحسس والزعل والتوجاس
مثل المرض/ من لا ايتوقاه يفنيه
والناس مثلك هم للناس الانفاس
مثل الهوى/ واقول لوقلت لي ليه
ياصاحبي من شاف نفسه على الناس
مثل الغبار يصير محد يدانيه

******
لاهنت ياعبدالله وانا اللي شاكر لحضورك واسئلتك وانا سعيد جدا ..
شكرا لك من كل قلبي