24-11-2010, 03:04 PM
|
|
واقول : أحبّك بقلبي ، ويزعل لساني ! شف كيف حبّك مجنّنا ، وممتعنا :)
حتى لو انّا قطعنا الصوت بنعاني !
الذكريات القديمه باقيه معنا !
وحتى لو انّا افترقنا كيف ينساني ؟
وشلون ابنساه وكلِ شي يجمعنا ؟!
كل الاماكن تردّد اجمل اغاني
كنّا نتسابق ونهديها لمسامعنا !
ليه نتباعد مادام الكون ذا فاني ؟
ليه عن دروب الوصل نعلن تراجعنا ؟
يعني وش اللي بعد للحين ما جاني ؟
وحظٍ جمعنا بالامس اليوم يقمعنا
ما همّني لو ظروف الوقت تعصاني
وما همّني لو عيون الكون تتبعنا
عندي الاهم شوفتك يا بعد من جاني
لبّيه يا ضحكنا ، ولبّا [ مواجعنا ] !
اشواقي ، وعيونك ف كل ليل تنخاني
تقول : شوفي النوى وشلون يوجعنا !
وانا لو ان الظروف تخاوي جناني ؟
لا اخلّي الوصل يا كلنا ، ويشبعنا !
اقرب حبيبي ولا تهتم لاحزاني
خل الورود اتغنّى في مرابعنا
انا وقلبي وعيني نجر الالحاني
وبصوت واحد [ نحبّك ] وانت سامعنا !
حبّك بعيني طفل لاجي لاحضاني
كبّرته ، واصبح عن الزلات يردعنا !
اشتاقلك وادعي الله دوم يبلاني
في زايد الشوق لو ينثر مدامعنا !
واقول : أحبّك بقلبي ، ويزعل لساني !
شف كيف حبّك مجنّنا ، وممتعنا :)
ساعة لقا لو تباع بغالي الاثماني ؟
ندفع ، ولو تشترى ب / مليون ؟ ما بعنا !
ما نقّص الحب لا شانك ، ولا شاني
حنّا هوانا [ يقدّرنا ، ويرفعنا ]
حنّا ملينا الفضا ضحكات ، واماني
وحنّا قهرنا كثير اشياء تفزعنا !
على كثر ما هويتك ، وانت تهواني ؟
على كثر ما قدرنا الشين روّعنا !
وعلى كثر ما نجامل وقتنا الجاني ؟
على كثر ما يبي الفرقا ولا [ طعنا ] !
والواقع اللّي تحدّيت ، وتحداني ؟
اخترت منّه ملامح تحكي واقعنا :
الحب لولا معاناته والاشجاني ؟
ما كان صار اللقا [ ابرز مطامعنا ] !
والحب ما ينتهي وحتى لو انهاني ؟
عزاي ما شفت دمعك في موادعنا !
الشاعرة متعبة عسافها
|