من عيون الحزن والضيق ظلما ما بعدها نور
تقوم أول مواجع فالصـدر تاخـذ مساحاتـه
يعيش الهم وتموت السعاده ما وصلهـا دور
ويبقى للفرح ذكرى تمـر القلـب شمّاتـه !
نعم ما فالحياه قصور لو إن الزمـان يـدور
ولا ضاق الفضا ساعـه بروحاتـه وجيّاتـه
وأنا ما فيه لذه عانقت قلبـي عشـان يثـور
لأني فالزمن عابـر ولا استوطـن ملذاتـه !
تعلمت الحقيقه من حقيقة خاطـر المكسـور
وعرفت ( الخاطر المكسور ) ما يحتاج لإثباته
أعيش بعالم الفوضى مقيّد للحـزن والجـور
وأداعب سيرة دموع الفرح لا شفت دمعاته !
أعانق ما بقى فأغلا خيـال يشدنـي للنـور
تحت كف الظلام اللي رسم بالزيف بسماتـه
هذا واقع حياه وما على فعل الزمان قصـور
زرع فيني بساتين الشعر من طيب هقواته !
وإذا قالوا الشعر كله أحاسيس وغلا وشعـور
أنا أقول الشعر ذنب الخيال وحشمـة سكاتـه