يا صاحبـي مجبـور اعاتبـك لا بـاس
كله من اسبـاب الغـلا يـوم اعاتبـك
لو للحكم فـي صحـة الـراي مقيـاس
كـان اقتنعـت برايـك وراي صاحبـك
اكبـر عيوبـك دايمـاً يابـس الـراس
ما تستريـح الا علـى اللـي يناسبـك
ترا الحياة اكبر مـن مجـرد احسـاس
تضيـع فـي غبـة بحرهـا مواهـبـك
ما فيـه شـك ادروس الايـام نبـراس
الشك في .... هل تحتويهـا تجاربـك؟؟
تعيـش فـي دوامـة العمـر عسّـاس
تلميـذ واحــداث الليـالـي تـدربـك
ومن مبتدا عمرك الـى نـزع الانفـاس
تلقى حصيلـك مـا يضاهـي متاعبـك
علم الحياة ادراكه اصعب مـن اليـاس
واوسع رحابـه مـن وسايـع مذاهبـك
لو كان تقدر تحصـره بيـن الأقـواس
مـا عكّـرت سـود الليالـي مشاربـك
والناس .. قالوا قبلي وقبلك .. أجنـاس
ولا احد(ن) على رايه من الناس غاصبك
لا تحسب اللي يعجبـك يعجـب النـاس
ولا تحسب اللي يعجب النـاس يعجبـك
بعطيك لـدروب الأمـل .. درة ألمـاس
قبل الصبر ينفذ .. وتقـرب حضايبـك
اليا أعتنيـت بحفظهـا فـزت بالكـاس
وابشر بعـز(ن) مـا يقصّـر شواربـك
معرفة(ن) في غيـر ديـن الله إفـلاس
تلقـى جزاهـا عنـد مـن لا يخيـبـك