من لهفة الاشواق بكتب سيـرة ايجـاز
عن عشقي اللي مرتكب أثـم و كبايـر
واوصف حلا حسنك وشاللي فيه يمتـاز
لين الحروف تفزّ لك بأحلـى البشايـر
واغزوا فضاءات الغزل والقلب قـزّاز
وبيت الشعر بفتح لـه ابـواب وستايـر
واصعد على سطح القمر واحقق انجـاز
واكتب على وجهه .. زمن عاشق مغاير
وألملم اصداف البحر واعمل لها افـراز
واهدي لك احلاهم شكل يغري النظايـر
واصنع مدينه مالهـا معـدن ومركـاز
وابنى على الشاطي لك بْيوت وعمايـر
الحب يدفعني علـى تحقيـق الاعجـاز
وان ما قدرت اوصل ترى قصدي أساير
حبيبتي جيتك وانا عنـدي لـك ألغـاز
ألغاز ضلّـت تشتكـي عنـد الضمايـر
وش حال بنتٍ مغرمه في شخص معتاز
عاشت على وهم الهوى والقلـب بايـر
حبيبهـا لـه قاعـده مـا بيـن بـرواز
عشق الصبايا يمتثـل شـرب الزقايـر
وش حال من شاف الحكم للخصْم منحاز
يندب على جوز الزمـن والا العزايـر
وش حال قلبك يوم سحر الحب يجتـاز
كـل الحـدود المغلقـه بيـن العشايـر