صبآح الخير للأحبه
الحمـد للـه على الثلاث نقـاط ... توني واصـل من الملعـب ومن العـام اذا حضـرت للنصـر مايخسـر ابد ودايم يفوز بالثلاثه تبون الدوري !! تذاكر الله لا يهينكم قبل كل مباراه وازهلـوه اليوم قبل البلنتي الي سببه محتـرف القادسيه اقـول لخويي الي معي نعنبـو بليسـه ذا ما يخطي!! جاب العيد وسبـب بلنتي ههههههههههههه
طلباتي بسيطه لاتضيعون دراهم على محترفيين وتمارين وحوسه < يا وسع وجهي هههههههه
نقاط مهمه من المبـاراه
* جمهـور النصـر هو المعدن الاصلي للفريق والي باقي بحبه وولائه رغم كـل شي اليوم اطالع فيهم واقول قسم بالله ان تشجيعي للنصـر كلام فاضي !! احضر مباراتين فالسنه وامن عليهم وفيه ناس ضاربين مشاوير من الرياض والحسا عشان يحضرون وفوق ذا كله تصرفاتهم تقول قاطين فالنصر وخايفين دراهمهم تضيع لو ما شجعو !
* زينقا بالعربي مفلـس تكتيكـيّا !! خلو مساله غالب ولعبه ظهير على جنب اول مره في حياتي اشوف مدرب يلعب بـ 5 لاعبين وسط ولا يقدر يمسك النـص !! الظاهر يبيله 5 زياده عشان يقدر يسيطر عليه ؟ هالتكتيك ممتاز للامانه لكن يحتاج توظيف يعني مثـلا الخمس لاعبين اثنين منهم ثابتين كـ لاعبين دائره وبس واثنين اجنحه وواحد ساقط خلف المهاجم الي لازم يكون ثابت مع آخر مدافع للقادسيه في حالة الهجمه عليك الاجنحه يساندون الاظهره والمحاور الي هم ( عباس وبيتري ) واحد يميل مع الظهير ولاعب الوسط الي خلف المهاجم ( رزفان ) يرجع يغطي قدام الـ 18 مع المحور الثاني كذا تكون قفلت المنطقه الخلفيه صح وجاهز لبناء هجمه مرتده على طول في حالة الهجمه معك تهاجم بثلاث لاعبين من كل جهه ( ظهير + محور + جناح ) بالاضافه الى دعم صانع اللعب والجناح الثاني يكمل مهاجم ثاني مع السهلاوي فالصندوق لكن هالكلام كله ما شفته ابد !! زينقا لعب خمسه فالوسط وقال يالله انبسطو !! فوق ذا كله لعب القحطاني يمين وفيقا يسار ورزفان الي اساسا جاي لاعب جناح حطه صانع لعب ؟ والسهلاوي بعيد جدا جدا عن آخر مدافع وهذا الي سبب التخبط ذا كله
* بين الشوطين كنت ادردش مع نصراوي برى وقلت الاداريين بيغيرون التشكيله لان مافيها صبر ابد والحارثي بيكون مكان رزفان وهذا الي صار . القادسيه اقوى فنيا من الفيصلي والتعاون الي تعادلنا معهم لكن الفرق الوحيد ان هنا تدخلو الاداريين في تخطبات زينقا وهناك لا !!
* تغيير غالب بالدوخي اكبر خطا ارتكبه زينقا وكاد يكلفنا للاسف كان المفروض سحب السهلاوي ونزول الدوخي ورجعة غالب كلاعب محور مع بيتري وبكذا تتغير التشكيله لـ 4-2-2-2 وتقفل نص ملعبك بلاعبين نص مهوب بـ مهاجمين !!
* اذا ماشفت الزيلعي مكان رزفان فالمباراه الجايه تاكدو ان زينقا مفلس فنيا مهوب ضعيف وبس مثل ما الاغلبيه متوقعين الآن
* الزيلعي وفيقا والقحطاني كافين جدا في النص وفيصل بن تركي ملزوم يشـيل رزفان في الميركاتو الشتوي ويجيب لاعب مهاجم ثاني ما نحتاج قناص نبي مهاجم متحرك وان صدقت الانباء انه موتو فـ أدريان بربع مستواه راح يكون اللاعب الي يكمل النصر تكتيكيـّا وعلى اعلى مستوى
* النصر بحاجه كبيره لرجعة حسين لان الخيبري بالعربـي ماعنده ما عند جدتي !
* ماكين اكثر من ممتاز في المواجهات الفرديه لكن لو يستغل طوله في الكرات العرضيه صدقوني اني اضمن لكم هاللاعب يستمر اكثر من موسم مع النصـر
* برناوي !!! حرام والله اشوف خيرات ووليد عبدربه في المنتخب ولا اشوف لاعب بعطاء برناوي مع المنتخب ؟ عيبه الوحيد انه مهوب طويل لكن قوته البدنيه مغطيه على هالعيـب ومع شوية تطوير هاللاعب بيكون له شان كبير خصوصا ان سناتر الدفاع الي يلعبون باليسار في المملكه ما تعد منهم الا المنتشري ! وبعده على طول برناوي
* قبل المباراه قلت انها مباراة فيقاروا وبالفعل ذا اللاعب في المباريات الي مافيها تقفيل دفاعي نجم ولا يهون ابو قحط
ألف مبروك لعشاق العالمي
عقيد المدرهمات والمشرف الخلوق حاكم
وبقية عشاق العالمي ,
تحياتي وأشواقي وأعتذر على الأطاله ,