قال منهو واق في عال الرجوم اللي منيفه = بسفح مزمومٍ ماغير الحر الاشقر مدهلله
وارسل الدربيل مع صحراء معالمها مخيفه = تتعب السرحان وتخل الركايب كالهله
لانجوع ولاربوع ولاوليف ولاوليفه = ولانزول ولا طروش ولاصديق ٍ في محله
سهلةٍ جرداء مما شيها على الطرقي كليفه = السراب ابها يتطارد كالمرايا لمعتله
ودق خفاقن بوسط اضلوع ناحلتن نحيفه= والسبب فرقا الصديق اللي جنابه مانمله
ياعميد الشعر والشعار لاتطر النكيفه = بعدكم ناصر فلاهو يالسنافي جايزله
كل رجال ٍ شريف ايصادق ارجالن شريفه = ارغب العليا واحب اللي سواتي راغبله
وانت وافي بالعلوم الطيبه واللي نظيفه = العلوم الطيبه يدار ذكرك كاسبله
والنهايه مارزم الرعاد وسترسل رفيفه = بارقن تكشف بروقه بالمزون المستهله
التحيه تاصلك لونت في وادي حنيفه = من صديقن بالوفا يامن نخيته جاك كله
ناصر خنيفر