|
|
ما ادوّر الغره على عرض الأجواد أحقوقهم واجب وأنا اسقط احقوقي
البارحه ليل الشتاء شين لاعاد
برده شديد وراح من شد شوقي
في منتصف مدهال عذب اللما زاد
همي وغربالي وحزني وعوقي
يسوقني يمه مع الشوق جلا ّّد
تحت جناح الليل كني سروقي
بيض النوايا خاطري منه منقاد
ماغير ابا أكحل من هوى البال موقي
ياما جذبني ريحة المسك والكاد
وعبق الزهور اللي يحرك خفوقي
في سن جاهل بس للعلم نشّاد
امشي بعقل إنسان عاقل صدوقي
ما أبيع دمي خوف من كل نقّاد
غالي إلى آخر قطرة(ن) في عروقي
تمنعني العزه مع الملح والزاد
داخل عرين أسود ماني بلوقي
عندي كرامة عزوتي فوق الأشهاد
على سنام المجد والمجد فوقي
أفخر وللنخوه على الموت ورّاد
رهين للغيره ومثلي شفوقي
لو يستعيد الوقت غانم وشدّاد
والاّ غروب الشمس يصبح شروقي
ما ادوّر الغره على عرض الأجواد
أحقوقهم واجب وأنا اسقط احقوقي
حتى يموت من القهر كل حسّاد
اللي على شذب المقفي سبوقي
نقالت النمّه قليلين الأرشاد
زباين الهزله وساع الشدوقي
عايض الرشيدي
|