يا وش بقى بعطيك مني و لا جاك
ما باقي الا روحي أحيا بها لك
أوصف جمالك كل من شت و أهواك
و أزين أيامي بجلسة خيالك
يالغايب الحاضر بقلبي و لا ألقاك
أقرب من عروقي و صعب(ن) منالك
شالك زماني عن عيوني و وداك
لا شك وثق في ضلوعي حبالك
يا حاجب(ن) شمسي ورى ليل جفواك
ما ذا العهد بك قاسياً في دلالك
وشغيرك يا منوة القلب و أطغاك
على حبيب(ن) ما تخير بدالك
دنياي ما تصلح بلا شمس دنياك
و الليل يوحش لو تغيب هلالك
ما ينقطع ضمى الهوى الا على ماك
و لا يهون حره الا ظلالك
و لا تشوف العين زين (ن) بلياك
ولا يطرب سمعي الا مجالك
(( للأمير الشاعر خالد الفيصل))