[سعد بن عادي]

فمان الله مسافر للغيـاب وديـرة المجهـول
وانا ماني مسافر للغيـاب الاّ مـن اسبابـك
تعب كف الرضا يطرق عشانك بابك المقفـول
وتعبت اموت منك وفيك والك وعنك واحيا بك
وفيت ولا جنيت الاّ التعب في ساعة المحصول
لـك الله وخّـري عنّـي خنقتينـي بجلبابـك
بشوف الشمس وآشمّ الهوى واحرّر المعقـول
عسى ربي يعوضني طعـم توتـك وعنّابـك
لو انّي مستحيل انسى صراحه ريقك المعسول
هذاك اللي بعد مامرّ قلبـي طالـت اعشابـك
حليمه خيّطي ثوب الغريب القاتـل المقتـول
وشيلي جثـة آمالـه وحطّيهـا علـى بابـك
فجوج الارض واجد والقوافل خيرها موصـول
توّديني على ايّـة ديـرةٍ ماتحسـب حسابـك
دخيل الليل والشوق الكبير ورمشك المكحـول
تجلّي للحياه وحـرّري قلبـك مـن اعجابـك
تعبت اسأل سؤال السائل اللي يسأل المسؤول
من المسؤول ؟ عن زفرة زعلك وجمرة عتابك
وانا في ذمة القلب اليتيم الصـادق المعلـول
بريٍّ من مشاريـه احتمـالٍ ثـوّر اعصابـك
فمان الله والضيق انتهازي والفـرح مشلـول
فمان الله من عظمة لسـانٍ كـان هـلاّ بـك
نهار الحب طفـلٍ فالبـراءه هـزّه الهنـدول
قبـل مايكبـر ويستعمـرك ويشقّـق ثيابـك
عماك الظن وارهقتي ضريبة سيفك المسلـول
ماعاد لسيفك الجارح مكـان بسيّـد احبابـك
فمان الله يااغلى من نزل في رمشي المبلـول
وانا لك وعد مني ماانشدك عن سبّة غيابـك