عند قوش وفـرقتله بنجـونـي =واسلخو مني الحنك سلخ الضحيه
ومسكوا فك الحنك به يجرحوني =والمقـص بـيدين جـراح جـريـه
صابر تحت امرهم ما يرحموني =مغمض العينين مـالي مـقدريـه
قلت يادكتور بالهون انظروني =وابعد السـستر لا تمسـك ايديـه
وين عايض لو حضر يوم اطرحوني =كـود من يديـنهم ينجد خويــه
عادتك الجود يا زين الضعوني =فـزعـة الـي خـابرينك كـميـه
الدكاتر يازميلي غـربلونـي =مابقى إلا بالـقلم أكتب وصـيه
قصدهم لي عن وجعهن يسعفوني=والمرض ماعـرف مجهول الهويه
شـالو الاسنان مني عذبوني =كيف ذا يحصل وانا مالي خطيه
هرجهم بيكوز ويس ويرطنوني =والحقوها بقود وذا يصعب عليه
إذا نطقت بلهجتي ما يفهموني =والجواب أوكيه ولهجات خفيه