قلتي لي بخير؟؟ لا والله ماني بخيـر
غبتي بعدها..وضاق الكون في عينـي
عقبك طري ياحبيبي فالزمـن تغييـر
غديت ضايع ولاادري وين انا وينـي
وقتي لعب بي ومنك ماحصل تقصيـر
كملتي اللي نقـص معـه وكسرتينـي
إن قلت اباقف بوجه الريح مهما يصير
حظـي خذلنـي وعزمـي مايذرينـي
لوك قريبه قويت اللي جرالي ..ميـر
في عز ماكنـت محتاجـك تركتينـي
ماغير اجاهد فبعـدك غابـر التفكيـر
لاجيت اعذرك يقول انـك هجرتينـي
وعجزت ألاقي لصدك يالغـلا تبريـر
سوى إن قلبك تناسى الحب وسنينـي
أول لجل شوفتي تسبق خطاك الطيـر
ومن زود الاشواق لاجيتي حضنتينـي
وليمن فقدتك ظهرتي لي بـلا تأخيـر
تدرين فينـي وكنـك ساكنـه فينـي
والحين مثل الزمن حسيت بك تغييـر
وضعت بينك وبينه وين انـا وينـي
هذا وكلـه وأنتـي تسألينـي بخيـر
وانتي تعرفين.. غيباتك عمى عينـي