[المحترف العبسي]

السلام عليكم ورحمة الله وبركاته
انقل لكم طاروق جديد ورائع بين شعراء رائعين من شباب القبيله الشاعر مالك الصامل والشاعر زايد ابن عدله

زايد ابن عدله
من هجوسً كنّها زرق الرصاص من السواري00تحت كف الفارس اللي مايثنيها شليله
يالخياري لو على وجه الردي وسم ومواري00كان ماشفنا على وجه الثرى صاحب فضيله

مالك الصامل
من هجوسً مايروضها سواء رأس الخياري00لا بدعها يبتر اليمنى القصيره والطويله
أعرف ان الطيب مايحصر على بعض الدياري00لكن يعرّف على طيب الجمل وسم القبيله

زايد ابن عدله
ماعليّه يابن صامل من مكثرت الهذاري00مدت الكف السخيه خير من مد البخيله
أعرف ان الحصني الازهر ماهو مثل الضواري00وانت تدري والدليله ياوسيع العرف ذيله

مالك الصامل
البخيل لصرت ايمينه على الفسلات ضاري00ماتعود مدت اليمنى الكثيره والقليله
وانته اسندها على ابن الشافعي والا البخاري00يمكن انخلص عميل الخير من طلبت عميله

زايد ابن عدله
سرها مسرى الذيابه في دجا سود الغداري00واعرف انه مانكب شعب الخليل الا خليله
مانسندها على الجهال وشيوخ الحواري00مالها الا روس قومً مثلكم يأهل الجميله

مالك الصامل
كانها عادت علوم المجتمع سب وزواري00سطوتي نار وحطب وارقاب حسادي فتيله
وانت الاتقعد تدس السم بالرز البخاري00والله ان الموت اخير من المذله والفشيله

زايد ابن عدله
علّم الاشرم وابن مرسال ودحيم الخياري00 وابن مربح وابن ناصر وابن عجوين وزميله
محتمين الموقف الغصاب بخشوم الشباري00كان ماني قدها ماعاد تربطنا فصيله

مالك الصامل
تدري انّا ماسمعنا من الرعد صوت البواري00لكن اجمال العرب عاشت على جفال وهميله
يابن عدله تالي الايام وش فيك انتحاري00مير حنا نقول لك ياصاحبي مافيك حيله

زايد ابن عدله
كم صدرً فيه علم وكم راسً فيه طاري 00حدته قشر الليالي ليلةً في سد ليله
يوم شفت الناس حطت بالبلد مركز حضاري00ودي انافس مثل ناسً تنافس في موديله

مالك الصامل
والله اني فيك بالذات امتوري وامتواري00لاتردك هرجت الهراج ياراع الكحيله
ابك انا داري بهذا العلم مبطي وانت داي00بارقً يبرق وكل اعيون خلق الله تخيله

زايد ابن عدله
عارفً سوق البلد ياصاحبي بايع وشاري00كم تاجر يشتريبه مير ماجمّع حصيله
مأنت في وقت اللقى ياصاحبي ضايع وعاري00راهي الكفين ماتطرد ورى القيض وصميله

مالك الصامل
اغلب التجار حلفه داخل السوق ضطراري00يحلف التاجر على السلعه اليا ضيّع دليله
وابن عدله له مع اهل الطيب مقدار وقاري00بالموقف يعطي الجزلات ويكب الهزيله
000000000000000000000
وسلامتكم

الموضوع الأصلي: طاروق جديد بين الشاعر مالك الصامل والشاعر زايد ابن عدله | | الكاتب: المحترف العبسي | | المصدر: شبكة بني عبس