سامح الله كل ذكرى بيّحـت مكنـون صـدري
جابهـا ليـل الندامـة وارتكـت بيـن الحنايـا
مايطيب الجرح غاير لانزفه احسـاس حبـري
كل كلمـه مـن شعـوره زادت بقلبـي شقايـا
والله انّ العشـق بعـده يلحقـه منـي بقبـري
والله انّ القاف بعده صدق يشكـي مـن جفايـا
كنت احبّك واعتذر مازلت احبّك وانت عمـري
والضياع المر قلب(ن) ماحسب درب الخطايـا
قلب ماملّك لو انّه مل كثـر الصبـر صبـري
وش تبي وضلوع خفاق الهوى عـوج وعرايـا
بيّح الله سدّ قلـب(ن) هيّضـه بالوجـد قمـري
كل مافاضت عيونه صاح يااهل العشق يا .. يـا
ماطلبتك غير حاجة وانت باللي صـار تـدري
وادري انّك لو تبـي تجهـل بمكنـون النوايـا
ماعطيتك غير بيض احساس من قلبي وشعـري
وانت ماخليـت غيـر طعـون خفاقـي هدايـا
شف سراحين الغلا بين العروق الجرد تجـري
ويش اسـوي والذيابـه وسـط خفاقـي لعايـا
كان لك قلب(ن) يحنّ اعرف تراني ضعت بدري
فيك اهوجس في خيالك من خلايا فـي خلايـا
مالعنت الذاكرة في هاجسي مـن قبـل تطـري
لاجل اقول انّ الوفا لاهل الوفا طبـع وسجايـا
قلت اسامح كل ذكرى جت مع الهوجاس تسري
وقلت اسامح كل طاري له ورى صدري خفايـا
سامح الله كل ذكرى جت تبي تشتيـت فكـري
وسامح الله كل غالي لـه وطـن بيـن الحنايـا