محاورة رقم ((
2 )))
زلزال الرعود
سلام الله سلام المعزه والمسره=على عبس النقا والرياده والقياده
فلاحة زارع الخوخ لحقتها المضره=بعد ما لاح برق الامل واحرا براده
الكابتن
هلا يا مرحبا والبحر لوله ودره=على بنت الهوى من يد الكبتن قلاده
يلوح البرق والغيث ما شوف له جره=عسى الفلاح يلقى الزهر داخل بلاده
زلزال الرعود
انا بنشد عن الكابتن نجوم المجره=عسى نجوم المجره تجيب النا الافاده
عسى الفلاح خيره يلادي عنك شره=ثلاث سنين ما شفت نقص ولا زياده
الكابتن
يا كذب اللي ينجم لو التنجيم فره=لو يخاطب زحل مع عطارد ببتعاده
مدام انك تعرفه تمره ما نمره=أكيد أنك تميز خطاياه ورشاده
زلزال الرعود
أثرك اتناظر أقريب يا طياره مره=وعينك في نظرها مثل عين الجراده
احسب انك ليا وحيت وصفي ما تغره=بعد هذي ما نعطيك يالكابتن شهاده
الكابتن
يا كثر اللي عسى الوالده ما تذوق حره=يحسب انه مهيمن وفي يده السياده
انا ما اغبط زلزال لا كني ما ابره=عسى ما هو من اللي حديثين الولاده
زلزال الرعود
مع الجو الضبابي يا كبتن خوذ فره=مدام السرعه الزايده طبع(ن) وعاده
وانا ما كرهك طبعك ما هو طبع المكره=ولكنك تأثرت في حرب الاباده
الكابتن
أخاف البرد يذبحك مير الثوب زره=معي بالطايره لا تدور للوساده
تحب وتكرهه الناس قدمك مستمره=عسى عندك على رحلة الكبتن جلاده
زلزال الرعود
يا راع الطايره ما معك مثقال ذره=من علوم البدو غير عيدان العراده
ترا الفرسان ما تنوخذ بالحرب غره=ولو يوخذ زعيم العرب يبقى شداده
الكابتن
يا راع الجيب بالله كر الخط كره=وخلك بين جرف الشعيب والحماده
أحسبك جبت علم البخاري وابو هره=أثرك الشاوي اللي على ملحه وزاده
زلزال الرعود
انا مودي أخطي ولا ودك تشرهه=جماعتنا عزمونا على افراح السعاده
حضرنا مثل ما تشوف والدعوه مبره=انا وياك ما واحد(ن) حصل مراده
الكابتن
ما ذمك والمعزب عسى يكفيك بره=على هاللون خلك معه باره وهاده
تشيل القنبله يا بدوي وتقول صره=على نيه يسمونها نيه قراده
زلزال الرعود
لو ان الكون ما ضاق في بحره وبره=على شاني ولكن حرام الاستباده
تعرف الحاجه اليا أبتلك تصير مره=انا محتاج للي توصلني جواده