~~
في مهب الريح ودروبه نثرت
حلم ماغيره ولجله ماحييت
أشهد انك قاسي ٍ يومك هجرت
وأشهد إني في محبتكم وفيت
مانسيتك حتى أقول إني ذكرت
ولاسليتك حتى أقول إني سليت!!
كل ماسبلت بعيوني حضرت
عايش ٍ في قلبي اللي به ربيت
جيتني من بعد ماغبت وظهرت
والأماني بين حي وبين ميت
كيف ياخلي على قلبك قدرت
طاوعك قلبك علي ولا نسيت
انتظرتك وانتظرتك وانتظرت
ويوم ضاع العمر قلي ليه جيت
ياكثروقت ٍ على شانك هدرت
وانت لاهي ياحبيبي مادريت !!
وياكثر مانامت الناس وسهرت
مع خيالك ياحبيبي كم سريت
كم وكم دورت لك عذروعذرت
والمعاني تنتحر بي بيت بيت
ايه مازلت أعشقك لكن صبرت
والدليل إني على شانك عزيت
وكل ماطرّوك صديت وزفرت
وقمت اجاوب ونة ٍ منها بكيت !!
/
/
للمبـــدع / سلطـــان بـــن عــــادي