السلام عليكم ورحمة الله وبركاته وكل عام وأنتم بخير
قصيده للشاعر العلم عبدالله باتل الرشيدي ((البحر الميت)):
هذا الزمان وكل شـي لـه أسبـاب
كلـن يبـي ماكتـب لـه يلتقيبـه
دنيا عجيبه ترهـب العقـل ارهـاب
وتقسـيـم ربٍ مايعـلـم بغيـبـه
والله ماهـي بالتحـرص والأتعـاب
لكـن تسبـب كـل عبـد ونصيبـه
ونوب ٍ يعرقب لك نصيبك تعرقـاب
لو ضفت حاتم مايقـدم لـك زبيبـه
والطيب ماهو مظهر زيـن وثيـاب
ولاهـو حكـي باللسـان تحكيـبـه
الطيـب مايسويـه ياكـود هنـداب
صعب طريقـه والمراجـل صعيبـه
نصوه ونخوة ضيق وأخـلاق وآداب
وزود عليهـن زود زيـن الذهيبـه
وبالطيبين أحيـان تنفـك الأرقـاب
وليا جيتهم هانت عليـك المصيبـه
ولاالردي لو طـاب تلقـاه نصـاب
لوشفت بعـض المسكنـه تحتفيبـه
مالهـم ود ولاحبايـب ولاأحـبـاب
ولاأفلح ولاعين خير مـن ينتخيبـه
ولايقضي الـلازم ولايفتـح البـاب
(.....) بقـره تشويـه ولاتسيبـه
وليا بغا الحاجه يضلهـب تضلهـاب
تقول طفـل ٍ معـك لاقـي حليبـه
ويعطيك باثناء السالفه نظرة أعجاب
نظرة حبيب ٍ معجـب فـي حبيبـه
وليا قضاها منك عـن جيتـك تـاب
يروغ عنك روغـة ثعلـب زريبـه
ينساك ماكنك معـه رفيـق ٍ طـاب
رد الجزاء تمحـاه طـول المغيبـه
وبالناس موجـود خنازيـر وكـلاب
ومهبـل ٍ مـن كـل شـر قريبـه
وفيهم كـذوب ٍ للعراقيـب شـذاب
ثرثار هرج وكـل هـرج ٍ يهذيبـه
ياكبر فرق الروس عن فرق الأذناب
للـي ببعـض المعرفـه ينهقيـبـه
ولافيه ظلم أشد من ظلـم الأقـراب
ولافيه بلوى مثل بلـوى الغصيبـه
ومن لاحضر يحشم ويفقد ليا غـاب
ماهـو كفـو للأمـور الصعيـبـه
ولابـيـض التحلـيـق بـغـراب
ولاتلفـت الأنظـار كثـرت مغيبـه
لاصار مايحلق وهو حـر وعقـاب
أن طار وأن ماطار ماحـدن دريبـه
ومن قل مابيديه هذا الزمـن عـاب
وأن جاك كلن قـال لـك وشتبيبـه
ويمكن يحارب حرب نفسي تحـراب
أمـا بتجاهـل عـمـد ولابغيـبـه
لوفيه عزة نفس وأشجع من (عقاب)
لياأدبـرت دنيـاه مايشـاف طيبـه
والعقل لمـن الدهـر كشـر النـاب
ماينفعـك وتصيـر نفسـك كئيبـه
أحيان كنك واحد س عنده أعصـاب
وأحيان تحدث فيـك حالـه غريبـه
والعاقـل اللـي لايعيـب ولايعـاب
والجاهـل اللـي بالعـرب تبتليبـه
والطيب اللي طيـب عنـد الأجنـاب
ويرفا الناخي عـن خمـال ٍ يعيبـه
ويهتم ويحسب ويوخذ لـه أحسـاب
وليا ضرب تلقى ضروبـه عطيبـه
وأنا انجرفت ورحت مع غيهبن شاب
وسعادتـي بالـدو يـوم أغديـبـه
ياما صبرت سنيـن كنـي بـدولاب
وأنـا علـى والله مثـل اللهيـبـه
تقرصني العقرب وينهشنـي الـداب
أضحك وأنا السم التوي من دبيبـه
من جرف دوامه على شبك سرداب
مع سرمدن مديور وأشيـاء رهيبـه
مـن جـور دنيـا قلبتنـي تقـلاب
فـي كـل يـوم موديتنـي مصيبـه
وفـي مدرستهـا دربتـنـي دراب
تدريـب ضبـاط الحـرس للكتيبـه
وصبرت صبـر ٍ لاتلاشـى ولاذاب
صبر الحصاه اللي بـراس الجذيبـه
وأن وصلت الدعوى لحـزم كـلاب
أنا الشريب اللـي ينغـص شريبـه
والله لاأخـرب تاليتهـا تـخـراب
وبيعهـا برخيـص بيعـة ذهيـبـه