من قال مالك شي من فاقد الشـي
ماهو صحيح وفاقد الشي يعطيـه
مثل الشجر يعطي لنا بارد الفـي
يعطي الظلال ولاهب القيظ يكويـه
مثل القمر يعطي لنا برزخ الضـي
يعطي الضيا ومايندرى وش يغطيه
مثل العذاري تسقي النازح المـي
تسقي البعيـد ونخلهـا ماتسقيـه
مثل الطبيب اللي يداوي عن العي
لكـنّ ماهولاقـي احـدٍ يداويـه
عطيتك التحنان من خافـقٍ حـي
يعني عطيتك شي انا منحرم فيـه
أرويتك ابعضي وانا فاقـد الـري
مخفي ظماي وقلبي الحزن طاويه
لي في عيونك لاح مستقبلٍ جـي
حلمٍ بعيد ٍ .. ساهر الليل يرجيـه