ياعلاوي نجد علك مراديم السحاب ==== ديرةن فيها تربيت يوم اني صغير
ياطبيب النفس وشو علاج الاكتياب ==== اعطني وصفة علاجه ترى وضعي خطير
عشت في غربة حقايق وفي وضع اغتراب ==== والتجارب عرفتني على الشي الكثير
شفت ناسن ترسم الورده على صدر الغراب ==== والغراب اليابغيت المس الورده يطير
استفدت من الذيابه ومن نبح الكلاب ==== واستفدت من الرغا واستفدت من الهدير
ولاكسبت الامعرفة عزيزين الجناب ==== ولاخسرت الامعرفة عديمين الضمير
اقترب لامااقترب شين بعض الاقتراب ==== ابتعد لامبتعد شي في حقي كبير
ياسوالي كل مااطرحك ماالقالك جواب ==== مالي الاالصبر واهل الصبر توعد بخير
وصف خبلان الرخا مثل ضحضاح السراب ==== يفرح العطشان شوفه يحسبنه غدير
الردي لوهوولد عم لاتحسب له حساب ==== كم عزيزن ذله الوقت بضيافة حقير
الدروس انواع تطبيق ولاانتساب ==== بس انااللي طبق الوقت قدام المدير
ياغريب ان مت شلني الياهاك الهضاب ==== حط قبري بين عنتر وابن عمه زهير
حطني في مقبرة عبس مروين الحراب ==== حطني باعلى علم مروين الشطير
وان عسرك الوقت نطلع ونرجع للتراب ==== ويارث الارواح الالاه الاول والاخير
اول الدنيا طرب واوسط الدنيا عذاب ==== واخرتها الموت والقبر وحسابن عسير
ياجزيل الملك يا كافل رزق النياب ==== ياالاهي من عذابك برحمتك استجير
عيد بن مربح الرشيدي