لاضيّق الوقت صدري بين ليلٍ ويوم
وزادت عليّ الهموم وبانت أعراضها
وأمسىَ بقلبي لصلفات الطواري وسوم
والعين سامر نظرها بارقٍ هاضها
وتاقت حيام الهجوس لصاملات العلوم
اللي ورىَ الصدر مشتاها ومقياضها
ورّدتها لين تروى والخفوق مخدوم
من جمّةٍ يصدُر الروّاي ماغاضها
يأهل الهوى مابقالي في هواكم لزوم
خربَت قلوب العباد وكثرث أمراضها
عُقب الوفا والصراحه والطرب والسلوم
شدّت طوال العلوم وحلّت اعراضها
واليوم يأهل انفتاح التقنيه والرقوم
ماباقي الاّ رسوم الحب وأنقاضها
الحب مايتبع الموضه وطرز الهدوم
ويخلف مذاهب طيور العشق وألفاضها
والحب ماهوب رسمة قلب فيها سهوم
مابين هاذيك زعّلها وذي راضها
اليوم كل ٍ يصيد وكل طير ٍيحوم
وكم صيدة ٍشاع ماقعها ومنهاضها
لين اصبح الحب حربً مثل حرب النجوم
واللي ماتِرخِص شيمها تِهتَك أعراضها
والعز مأحد لبس ثوبه بليّا كموم
جعل المنايا تقود اللاش لحياضها
تصحى القلوب الجَبانه في الحلوم وتنوم
والليل يضحك براضيهاومغتاضها
وتكتُب حكايات عشق ٍمن خيال الرخوم
وتجارب ٍماتبيّض وجه من خاضها
لكنّ لولا التغيّر والفتن والسموم
ماكان جفّت رياض القاع وفياضها
واللي تغيّر ماهو بس الهوى والسلوم
اليوم حتى الصداقه كثرت أغراضها
سعد بن مناحي بن شفلوت