بسم الله الرحمن الرحيم
السلام عليكم ورحمة الله وبركاته
هذه القصيدة بمناسبة حلول شهر رمضان أعاده الله علينا باليمن والبركات أهديها إلى أعضاء وزوار المنتدى
ياقلب مدري لا متى أزجرك وانهيك؟ = تعبت من زجرك وطالت خطاياك
مستقبلك خافي ومحفوظ ماضيك =واللي بقا من العمر يا قلب يخفاك !
العمر نصه راح وأنت بتماديك = ما اجزعك ما فاتك؟ وما جاك ما رضاك؟
ليا متى ياقلب غارق بأمانيك ؟! = ماشفت من يرحل من الناس ما ادهاك ؟!
ما تعتبر من كم قريب متعديك؟! = كم من قريب ومن بعيدٍ تعداك ؟!
ياقلب شيب الراس ما هو مكفيك! = والشيب بالعارض وبالدقن ما كفاك !
ياقلب تدري الموت ما هو مخليك = ياقلب والله لو نسيته ما ينساك
استغفر الله كن ما هو متقفيك! =لا والذي بالروح والدم مشاك
انه مثل ما جا لغيرك لياتيك = قبلك خذا يا قلب ذولا وذولاك
يا قلب قلي وش كثر زاد راعيك ؟= وش الزهاب اللي معه من عطاياك ؟
هلّ رمضان ان كان ياقلب يمديك = كان السنين اللي مضن معك ممداك
فرصة تكثف من جهودك لواليك =واخلص بما تعمل بجهدك لمولاك
لعل من غبات الادراك ينجيك =وتفوز برضا خالقك كانه أنجاك
عساه من حامي لظى النار يحميك = و في رحمته يرحم جنابك ويرعاك
أبطيت بالتسويف والموت قافيك = وش الزهاب اللي معك من عطاياك ؟
أحمد عبيد الهنيدي