ازعل بكيفك لين ماقدر اراضيك
ياعل مايرضون لي يزعلونك
حاولت انسى بس ماني بناسيك
ومابي اكون ضعيف قدام عينك
واحد تحب اثنين ماهمني فيك
ثلاث اربع حبهم لو يبونك
ونا... ولو اني على النفس ابديك
لكن مقدر امنعك من شطونك
انته مزاجي تجاري اللي يجاريك
ولامن اخذت كفايتك قلت,هونك
تاخذ حسب افكارهم لي تماشيك
وتترك بقاياهم ولو هم يجونك
ابا اعترف لك ان محدٍ يضاهيك
بطيب قلبك وحسن زينك ولونك
وبا اعترف لك ان حضرة معاليك
فنان وبفنّك بتأسر زبونك
وبا اعترف لك ان نفسي اخاويك
لكن تمنع ثمة اسباب دونك
وبا اعترف لك لو بيكثر محبيك
ماظن تلقى محبتي لي تصونك
وبا اعترف لك انني جد هاويك
لكن قلبي محكمّه في شؤونك
ماحب استرسل واصيغ الدواليك
واني بك العاشق ومغرم فتونك
طبعي كذا ان جيت يامرحبا فيك
وان رحت حيابك وتسلم عيونك
بهدوء جيتك دون ادعيك واطريك
وبهدوء برحل دون حسك يخونك