[وحيد]

عزاه يا قلبن همومه تشلواه
... شلي السباع الظاريات لعشاها
همه يروده في صباحه وممساه
... هذي تجيه وذيك تقبل وراها
من صاحبن شدت ونازت مطاياه
... ومن عقبها وانا اتحرى لقاها
حالت ظروف الوقت دونه ولاماه
... وانا بعدها حالتي في عماها
الحب سوا بالهواوي سواياه
... يفز قلبه ليتذكر حلاها
ما ينفعك يا قلب ترديد ويلاه
... وماينفع العينين همال ماها
ما ينفع الا قطف وردة شفاياه
... هذا علاج الروح وهذا دواها
في حزتن فيها القمر لابس غطاه
... والروح شفقا للسوالف معاها
سوالفن بالهمس ماهي ملالاه
... في هجعة الممسين تالي مساها
من لامني في الحب يارب تبلاه
... في حب تلعات الرقاب وهواها