صاحبي
صاحبي لاتلحق الدنيا حسافه=لا يسجّ ابنا هديل الراعبيّه
ياعشيري وش بقى ثاني نخافه=بالدروب الموحشات السرمديّه
مادريت إنّا تقاسمنا المسافه=نصّ ليّ ونصّ مكتوبٍ عليّه
ليه أملّ من الطريق وليه أعافه=والمدا قيض وسراب ومهمهيّه
ماورى ريع الطعون إلا ّ الكلافه=كلّ مااهيجن وأذبّ السامريّه
وأنت ياطهر الصباح وياعفافه=لا تصافحني بحدّ الحضرميّه
لا يغرّك نبض كفي وأرتجافه=ضاق بي قلبي وشلته في يديّه
شاعرنا الكبير مساعد الرشيدي العبسي