بسم الله الرحمن الرحيم..
أحبتي ,,أسعد الله أيامكم..ولياليكم..
قصيدة..كتبتها..أبان كارثة الأسهم..والتي لازالت..مستمرة.
وقد تستمر..وتستمر..لمَ لا؟؟!!
عسى أن تحوز..على غايتي..التي هي استحسانكم...
سوق الافلاس...!!
يامدورين الفود قي سوق الافلاس =نصيحتي لله لا تقربونه
اليا نزل في نزلته كتم الانفاس=والياارتفع مافيه أمل تلحقونه
أوضاعنا مابين وقفه ومجلاس=والكل منا ماتغمض عيونه
نبيع والانشتري وضعنا انحاس=ولياشرينا في سهم ينكبونه
يوصي بعضنا دون علمٍ ولا اقياس=ذاك السهم ياالربع لاتتركونه
السهم هذا لاتبيعونه ألماس=ايحقق الثروة لمن يشترونه
أحيان تصدف ويتنومس تنوماس=يستانس الموصي ويكثر زبونه
وليافشل في التوصيه قال لاباس=نصبر ليابكره عسى يرفعونه
سوق يخلي كامل العرف يحتاس=يامدعين الفهم ماتفهمونه
مثل الحبر وان سال من فوق قرطاس=في المحبره والله ماترجعونه
انهار وانهاروا معاه أغلب الناس=أحدٍ ذلف وأحدٍ يعالج طعونه
وأحدٍ مشى مجنون لاعقل لاأحساس=واصبح ينشد كل من هم يجونه
وأحدٍ يحاول بالأمل يطرد الياس=لكنه الواقع يخيب ظنونه
وأحدٍ يصفق يضرب أخماس باخماس=ومن القهر يبكي وزادت غبونه
رحنا ضحايا سووق لاطماع الانجاس=من الجشع ماعندنا ياخذونه
ضحكة على العالم لتفريغ الأكياس=مال الضعيف بلا سبب ينهبونه
وابنوكنا اللي دسو السم في الكاس=كانو ا دعاة السوق ويآزرونه
أعطوا لنا الفرصة ودقوا بالاجراس=لاجاهم المديون زادوا ديونه
ضعنا بصحرا دكها ليل الادماس=لاحولنا فزعة ولامن معونه
على العموم اللي حصل درس حساس=لومافهمنا الدرس لاتشرحونه
مالفايدة لاطاحت الفاس بالراس=فات اختبار الدرس لاتجدولونه
جينا ندور فود في سوق الافلاس=ولا لقينا الا الفلس والمهونه
.............
وعسى الله مايخسر..مسلم..
........
فاااائق
الشكر..والتقدير..