شبيت ضو القصيد وفاحت الدله
المضرم الرأس والهاجس مبهرها
الصدر بيت الشعر والبال طارله
بيبان بيت الشعر يفتح معابرها
من امس مشغول أعقد الحبل وحله
من كثر مادون الفكره وغيرها
من واقع الخبره أدراها عن الزله
مايعتني بالقصيده غير شاعرها
أدري بجزل الكلام الناس ماتمله
والنقد وارد ولو كنت متخيرها
يامرحبا بسم ابن عجوين حي الله
جميع من شرف الحفله ونورها
بحضوركم تو نور حفلنا كله
حقيقه الناس ماتوصف مشاعرها
للمدح وقته واقول المدح في حله
تزها المدايح مبارك يوم اسطرها
هذا الدويله عسى الايام تمهل له
يفداه من وقفته يدرى مخاطرها
لاشان وجه الزمان وبانت الخله
يشهد على ماضي الافعال حاضرها
كرم رحابة صدر خالي من الذله
أبتع من السيف لادارت دوايرها
ثابت على منهجه ماغير المله
ماتغشه أهل المظاهر في مظاهرها
أقرو ابيض الصحايف وش مسجل له
مضرب مثل للقبيله في مفاخرها
ماقلت غير الكلام اللي عليه الله
للي يبون الحقايق من مصادرها
يحق له يفتخر وحجاجه ايفله
العبس زود الشرف بحضور زايرها
يقولها الشاعر اللي مايخيل له
فيك أعذب ابيات شعره ماتخاسرها
ابختصر زبدة الهرج احسنه قله
قطفت ماطاب لي ماني مكثرها