الي الجوري
مساء الورد يا نور(ن) سطع يالول يا ماسه
مساء(ن) ما أشوفك فيه ماهو من مساءاتي
مساء أجمل يصير أجمل مسا لاصرت جلاّسه
تسولف لي وترسم في ظلام الليل بسماتي
تفضّل يا أمل عمري وياحلمه وأنفاسه
تفضّل ما عزمت الا انت يا أغلى بشر ياتي
تعال بقرب محبوب(ن) كتب لك اروع احساسه
ويطلبك العذر لابه قصور(ن) بالكتاباتي
تعال اسكن ربيع القلب واستمتع بنسناسه
ربيع(ن) ما تربّع فيه ماهو من ربيعاتي
عيوني بك تذوب ومنك وصارت حيل حسّاسه
لياجاها الخطاء منّك تهل كثير عبراتي
أحبّك..لا تقول اشكثر مدري معرف اقياسه
أعرف انّك غديت اجمل ملذّه في ملذّاتي
أبي أحضنك في ليل(ن) غفى نجمه مع ناسه
ولابه غير انا ويّاك نبحر بالمسرّاتي
أصب أشواقي بكاسك ومرّه اقلب الكاسه!!
أبي اروي ظماي اللي يزيد كثير غلطاتي
هنيّا خلك بجنبي مكان(ن) ما احد داسه
أبي تبقى اثاريّك علامه في مساحاتي
حبيبي دامك بفكري يخف كثير وسواسه
والا منّك رحلت اغلط واعوّد في تفاهاتي
نصيحة لي معك محبوب خلّك عالق براسه
ولا يطري لك تهدّه وتغرق في متاهاتي