الي الجوري
خلّ الزعل لا تسمع لقول عذال
و اسمع كلامٍ من ضميري موثّق
دام الرضى في حضرتك زلزل جبال
هاك القصايد و البقيه تلحّق
يا سيدي يا بو سلاسل و خلخال
يا ريحة العود الاصيل المعتّق
يا ناقش الحنّى على الكف بخبال
إتمخطر بْنقش الذهب لين اصفّق
في خدك آغنّي تقاسيم موال
وفي نحرك آقطع عروق و ألصّق
خل الظمى يقبل على عدّ همال
يوم الثغر منه زلالك تدفّق
وخل البطى يسمع له الحضن وش قال
من بعد ما ضلعك غصونه تورّق
مضواك فرحه من قبل ألبس عقال
و مسراك همٍ في ضميري تعمّق
تعبت أنادي يا حبيبي لِلِوْصال
إلين وجهي بالفيشله تشقّق
وتعبت أسرج في الرجا وعد خيال
و الوعد طاف وخيط سرجي تفتّق
إن كان لك حنا على الكف لا زال
عاد الامل باقي لوعدٍ محقّق
وإن كنت راضي يا هوى الروح و البال
خل الزعل و إنسى الكلام الملفّق
لان الرضى في حضرتك يهدم جبال
يوم القصايد تنكتب و تِّوثّق