ما ابغاك بس ادراك ماودي اجفاك = تقدير لسنين الغلا الماضاتي
والا انت خاين عهد بانت خفاياك = انك على سود النوايا تباتي
سرقت قلبي بالمعاليق ماقواك = واللي تركت عروشه الخاوياتي
اعميتني بالحب واغرورك اعماك= تزيد سياتك وازيد احسناتي
تنام واسهر مع خيالك وذكراك = والم بصدور القصايد شتاتي
وتصدعني واتباشر بلقياك= والله ماتلقى من يسوي سواتي
وانوي عتابك والبلا كل ما القاك = يذوب هرجي في شواطي سكاتي
انساك من هرج العتب لو مانساك = وشوفه ضحية حب في وسط ذاتي
ولا تامن الدنيا ودورات الافلاك= وارجوك فكرفي حقيقة وصاتي
يمكن يدور الوقت وتهون فرقاك = وتصير قصه ماضيه في حياتي
لكن لياهالحين ساكت وابدراك = والله يستر لا يتفجر سكاتي