قصيدة الشاعر عوده بن عواد الخياري العبسية
 

بديت باسم منزل العلم تنزيل *** معلم ابن آدم جميع الوسايل

منزل القرآن من بعد الانجيل *** شفاء ورحمه معجزه مع فضايل

اللي حماء بيت الحرم من هل الفيل*** يوم أبرهه على أقدس البقع صايل

أرسل عليه من السماء طير أبابيل*** بحجارة جتهم من الله نزايل

من بعد ذكر الله تكلمت بالقيل *** أبيات شعرن مابها قول قايل

قال الرشيدي يوم قال التماثيل *** فكر الرشيدي قال زين المثايل

عن القبيله ودي أعطي تفاصيل *** قبيلتي فيها تزين المثايل

حنا عرب ماننتمي من أسرائيل *** عرب عرب من يعربية قبايل

استبطل عز معززينه هل الخيل *** محفوظ عن وطية كديش ودخايل

الله خلقنا من تراب وصلاصيل *** سلالة أدم ماخلطتنا سلايل

ولا أحد طلع مع باذر العشب بالسيل *** في وداين يوم أصبح الصبح سايل

أخت القبايل ماعليه مداخيل *** الدين واحد واللغة والفعايل

والرب واحد ماعبدنا الأباطيل *** أخوان بالاسلام والكل زايل

والدم واحد الشكل والتحاليل *** يطلع على التحليل نفس الفصايل

الدم واحد من سلالة أسماعيل *** من ساس جرهم والرجال الأويل

من قيس بن عيلان نرجع بتفصيل *** والعنصرية للرجال الهزايل

والجاهلية في عقول الجوهيل *** والا الذكي من ذروة العرف نايل

والكبر ويل وجارنا الله من الويل *** أكبر رذيلة من كبائر الرذايل

وأنا رشيدي من رجال مشاكيل *** من لابتن يوم الملاقى هوايل

ربعي هل الطولات سوء أهل الخيل *** بني رشيد مجودين الحبايل

أن جاء نهارا فيه عيال ومعيل *** في يوم أسود وأحمر الدم سايل

كدوا عليهم شاربين الفناجيل *** و يروون حد مرهفات الصقايل

حريبهم يسهر لتالي الليل *** وياما زراعو بأقصى ضميره غلايل

غلن زرع وسط القلوب المغاليل *** ماينمحي لو محدثاته سمايل

غلن به الحاقد يعظ الأناميل *** مثل الندة بقلب عفن السلايل

ياما أيتمو والبيض راحن مراميل *** بالعون صارن رمل عقب الحلايل

وكم شيخ قوم حط فوقه غراميل *** عليه ناحن ناقضات الجديل

ياما غدو بالضود وأقفى زعاجيل *** بالجيش ولا فوق قب الاصايل

كم من حلايب قوم جيبن مقابيل *** راحن ولاعنه حريبا يسايل

وكم فارس أصبح واقعا بالمحابيل *** وكم فارس شاف النجوم القوايل

وكم فارس حرم حليب المباهيل ***حرم لبن ناقة عيال الحمايل

وقت يشيب بالمراضيع ويهيل *** يوم أنها في وقت صايل وجايل

يثنون من دون أمهات المخاليل *** فج النحور معبسات الشمايل

خويهم مرفي عن الحيف والميل *** وقصيرهم محفوظ ع كل طايل

أهل الكرم ومحرقين المعاميل *** تلقى زبار البن فوق النثايل

حنا سلايل عبس جيلن على جيل *** سم الحريب ومدخلين الدخايل

سجلنا التاريخ ماضي تساجيل *** وعلق لنا في لوحة العز فايل

قبيلة نالت من العز بالحيل *** واستوطنت بين المدينة وحائل

وتطاولو وادى الرمة بالمنازيل *** مدهال وضحن يرتعن الدبايل

و من شرق أبنات وفيهن حلاحيل *** وفي عين ابن قنور وافي الخصايل

ومن العماير سوق لأدنى مكيحيل *** ومن اللحن حتى جبار شمايل

وفي دولة السودان في شرقي النيل *** ويم الكويت شعوب ماهي قلايل

هذا مساكن كاسب التماثيل *** ورثن خذوه من الجدود الأويل

رشايده من عصر أبو زيد والفيل *** مطوعين الا عن الحق عايل

هذا الكلام اللي عليه التداليل *** من غير مقصورن بباقي القبايل

واليوم في حكم السعودي تساهيل *** أمن وأمان وراح دور الفعايل

حكم أبو تركي زال كل العراقيل *** والله مانرضى بداله بدايل

بالعدل قائم وبطل الشر تبطيل *** وبالسيف الأجرد عدل كل مايل

وأقفى الظلام وزال كل العراقيل ** ودور الجهل ولى عن الناس زايل

ولا فيه فرق بين الأمة وتفضيل *** الا بتقوى الله وزين العمايل

أكرمك أتقاكم كثير التهاليل **** يدي فروض الله مدور فضايل

هذا كلام مفصل العلم تفصيل *** لأهل العقول الصاحية والهبايل

وصلات ربي عد رش الهماليل **** عدد من صلى وصائم النفايل

على نبي ذلل الشرك تذليل *** محمد الا ماوقع بالزلايل

قصيده رائعه ووافيه ولاهي غريبه على الشاعر
مشكور ع النقل

تم التعديل ببعض الابيات

قبل التعديل
هذا مساكن كاسبن التماثيل *** ورثن خذوه من الجدود الاوايل

البيت الثاني
وأقفى الظلام وزال كل العراقيل *** ودور الجهل ولا عن الناس زايل

بعد التعديل

هذي مساكن كاسبن التنافيل *** ورثن خذوه من الجدود الأوايل

وأقفى الظلام وولعن القناديل*** ودور الجهل ولا عن الناس زايل

تم التعديل من قبل صاحب القصيده

مشكور برد الرياض ومراهيش على مروركم