ايام مرت بدون الوان للصوره=عنها الروايه تناقل مثل الاحلامي
عند اكثر الناس معروفه ومخبوره=حياة بدوان عنها بعيد الاعلامي
والي لحق وقتها معها خذا دوره=اما سرح بالبهم والا بالاغنامي
والا سرح بالركا يب ونتطا كوره =احيان راكب ونوبن حاف الاقدامي
يلفح شليله وراهافاتحن زوره=وعقال ذوده طواه بسطه حزامي
من كثر مايوده الها انبح حنجوره=مع هلفيافي ورا عجفات الاسنامي
ورقاب ذوده الركبيه ومقهوره=واليا رزمت بالحنين حورها قامي
هذيك يبهل عليها وذيك مصروره=يحسب حساب العرب غبوق ويدامي
واليارحل فوق زمله شال مضهوره=واليا رغا شعيل حط بخشمه خزامي
وديار صيد الفلا ماهي محضوره= وراع المقانيص مثل الجايع الضامي
واليارقا بالطويل ومد ناضوره=ياكثر ميشوف من صيد الفلا النامي
في جو قفريتن بالخير مذكوره=ماعمر جاها وعود مفلس الرامي
ماحد حزم الفزير ومارفع قوره=وماحد عمعم وذيك اللوب من شامي
وماحد الابيض على جدره وعثموره=وصهلوج ريع الهوا والعاجر الزامي
ياحبي الها عساها دوم معموره= اديار ربعن عزاز نفوس وكرامي
بدو(ن) قبل لايبين الصبح في نوره=والنار تشعم وصوت النجر هندامي
واليا تلافو عليها رايهم شوره =علومهم مادخلها هرج نمامي
نياتهم صافيه والحال مستوره=ماعندهم كثرة الشكه والاوهامي
ماهمهم غير شوف الارض ممطوره=من شان يرعون فيها العشب لاقامي
لكن هذا زمان وفاتت عصوره= وجانا زمانن كثيره فيه الاخصامي
ناسن تحارب وناسن تلعب الكوره =وناسن كثيرين مايصلون الارحامي
حتى الزيارات للجيران مهجوره=رغم ان فيها حديث اينص وحكامي
دنيا غريبه ومنها الناس مذعوره= ياسرع الايام فيها وسرع الاعوامي
ودورات الافلاك بمر الرب ماموره=الله يهين العدا ويعز الاسلامي