قبيلة بني رشيد - يمة الشرق

قصيدة يمة الشرق

ذنوب الخلق في كفه ..وذنبي بالهوى كفه
عشقتك وابتديتك وانتهيتك مثل لمح البرق
ذكرت اني قطفت احلى نواويرك بلا عفه
وأخذ مني هواك القلب واشتاله وتل العرق
صحيح ان السنين طوال ..لكن الزمن رفه
برمش الناعس اللي ما عسفها شاعر بالطرق
تسلهم به وتشكي من خلا هالقلب وتكفه
حرامٍ ما درت عن ها القصيد ولا تعرف السرق
تذكرها وخذ قلبي هوى ومن العنا عفه
تعبت ولا بقى بي غير جفنٍ في دموعي غرق
تعال وشرّف عيوني تراها حارت الدفه
وصدقني يمين أو هي شمال أو جنبت أو شرق
ترى المقصد زمان ولا عرفنا غير وش خفه
ثقيلٍ باردٍ جرّح فؤادينا طعونه زرق
تعال ولا تظن الخوف مينا والعنا ضفه
مدام إني أموتك عشق .. خذ مني قصيدي وارق
تعدى به ألم خوفك تجمل به قم وضفه
ترى حرّ القصيد اللي يقوله شاعرك لك رق
عبيدٍ سيدها سمعك ثمنها تلمس الشفه
وهي ظميا وأنا بيني وبين الما سهال برق
ترفق لا تلوم العاشق اللي ما قضى شفه
لمس صالي غضاك ولا درى وش آخرة هالحرق
ترفق ما بقى غير السهر ونجوم منكفه
على عيني تراعيني واهدهدها ولا من فرق
أموتك مذنبٍ والا اموتك بالهوى عفه
تراني ما لقيت الا عيونك يمة للشرق

ذعار الرشيدي