ياراكبين العوص ردوا وصاتي = امانةً معكم توصل فضيه
قولو يقول سعود هرجً ثباتي = حليا الغزيل والغزيل حليه
راحت بكل الزين عن البناتي = بنت القروم اللي حمو كل هيه
واللي ثمانه بالوصايف تواتي = مثل البرد كل الحلا في شفيه
ياعود موزن ناعمً بالنباتي = مزينً غرسه بجال الركيه
اللي رقد معها مدام الحياتي = ياعيال والله مسعدً واهنيه
ياشبه وضحى ربعت بفرداتي = خط الرويكب وسمها جعفريه
ترعى جوانب حجرً سايلاتي = يازين رعيه بالفياض العذيه
خزيزة الشغموم عطب الفواتي = اللي نهار الضيق يلحق خويه
البطن بطن اللي طوتها السراتي = مروحه يوم المزاهب خليه
والعين عين اللي بدا النايفاتي = حرا لياشاف الحباري قضيه
وابو قرونً ياولد مايلاتي = حسب اعتقادي بالعدد حول ميه
والنهد بيض اللي رفت بالصفاتي = بيض الحمامه وان رفت له بفيه
حمرً نهوده ياولد قاعداتي = مامصها الرضاع عقب عشويه
وابو عضوداً ياولد مدمجاتي = شقحً بياضه مثل قلب الوديه
قلت انتي خلصتي ياضبي المهاتي = والا تبقى لك حقوقً عليه
قالت خلصة ولابقالي شفاتي = خلصة مخلاص الرجل عن خويه
يابنت قرمً يلحق المقفياتي = هذا تراه اللي طلبتي عليه
معكم وداعه يااهل المسمناتي = من خوف لاتلوم عليه فضيه
ياليتني وياه دب الحياتي = جالس معاها قاعدينً سويه
سوالفه احلا من حليب المشاتي = ليا قطفن العشب يم الحنيه
وضحن شماليات ومربعاتي = يرعن في روس الحزوم العذيه
كلش رباع اسنونها كاملاتي = اصغرهن اللي يوم ولدت ثنيه
يرعن من الشملي اليا بارياتي = برضً مرا ماهي دياراً وبيه
واليا قضى المرباع يجن وارداتي = على الحفيره يوم يمشي سريه
اليا شغلوها جابت الجم ياتي = عداً روي ماهي رسوسن ضميه
الشاعرالعروف/ سعود بن حنيفان العويمري (رحمة الله عليه)

الله يرحم والدك والله يعطيك العافية على النقل
وتقبل مروري