راكب اللي وان سرى من تحت جنح الظلام=يتهقوى فيه من ينوي بعيد المراح
جيب لاندكروزر مجهزٍ باحدث نظام=يطوي الاميال ويسابق فجوج الرياح
صانعه مخ ٍ تغذى على شرب المدام=لاسمع بإذنه ولامره مناد الفلاح
لادعست يفز فزة شجيع ٍ للمقام=صوت المضهود بإسمه وقفاه الصياح
كن سواقه على السيت من ريش النعام=اذكر الله كن مشيه على خف وجناح
لاستوى في طارته واشر لربط الحزام=اسحبه بالكف الأيمن وطقه بالشباح
هلل وكبر وصلى وزودها سلام=واعتذر من ربع ٍ حشام واعطوه السماح
ولد ٍ محشوم مابين خاله والعمام=لايوصى ولايحرص خبير ٍ بالمراح
كن في عينه من الشوق باطراف الزمام=داره اللي ناو ٍ يحلها حول الصباح
وعن يمينه تاج راسه ودرعه والحزام=مايوصى كان سلم له زمام السلاح
ولد ٍ مسطور محشوم عداه الملام=ناطح لصكات بقعا وكافحها كفاح
ساري ٍ والجدي يلمع ولادونه عسام=والسوالف تلمس الجد وتعود مزاح
وميله حول الفجر مع طرف برق وعدام=والقمر سته وعشرين دوب الصبح ضاح
وحوله مع خشم حره على موعد كرام=وكن نوره من ورى الحزم برق ٍ يوم لاح
باقي ٍ بينه وبين الوعد شعب وسنام=ونحره لسهيل والصبح لاتلى الليل زاح
وبالوعد ربع ٍ نواحيش ورجال ٍ حشام=ماذكر فيهم هلابيس ويدينن شحاح
نازلين بطلحة ٍ كن فيتها غمام=حال دون الشمس واعتم على الارض البراح
في طرف روض ٍ قفر ماذكر حوله ثمام=لاوطا فيه القدم ريح نوع النبت فاح
ونارهم بالعز حيه ودلتهم شمام=والمه ماها من السيل من نبع ٍ قراح
منصتين لهرجة اللي على صدره وسام=شايب ٍ جاهد وكافح وكلل بالنجاح
منصتين لهرجته ماتقاطع بالكلام=مايبيح اسرار غيره وسده مايباح
ماعليهم من سوالف رديين الذمام=والعلوم الساقطه مالهم فيها صلاح
العلوم الواطيه في مواردها حيام=والعلوم الغانمه مثل زرقات ارماح
محترينه بالوعد ما احترو خبل ٍ خمام=والشبب منهم بتيسير رب العرش طاح
وسمعو صوته مثل صوت نواح الحمام=لابق ٍ له مع طرف حزم وصخور ٍ لقاح
وقابلوهم في تحيه وشوق ٍ بالسلام=واخذو منهم علوم ٍ لها روح وملاح
وجيت منهم والعذر والتحيه والسلام=نارهم بالعز حيه وهيبتهم سلاح