بسم الله ابدا واتعوّذ من بليس = ورمي بوجهه سبعةٍ من حجاره
وعلى النبي صليت وقت الغطاليس = وسجدت لله ركعتين استخاره
واخترت من فيض الفكر ضمّرٍ عيس = حمرٍ مدربهن على كل غاره
في وسط راسي مبعدات المراميس = اضفن على وجه المفكر وقاره
سريتهن لاهل الكرم والنواميس = ونوختهن قدام بيت الاماره
امارةٍ ماهي بمارة هلابيس = ميراث جد ولاكسبوها استعاره
عيال ماطر مبعدين المناطيس = العايضات أهل الظفر والجساره
ماتحصي افعال النشاما كراريس = لو يجمع الباحث رسب بختباره
ومن يوم جتني دعوته قلت لابيس = أنا وماملك جيت رهن الاشاره
من شان شكري ماختفي بالكواليس = وماحط من بيني وبينه ستاره
حضرت ابارك للرجال المعاريس = في ليلةٍ فيها الفرح شب ناره
في محفلٍ ناجح بكل المقاييس = يديره الماطر ونعم الاداره
هذا فهد بحرٍ من الطيب ماقيس = في كل حالاته يزود بغزاره
والنجم الاخر من صناديد فريس = جمال حاش المرجله في جداره
نوادر احرار بمواكر قرانيس = والحر الاشقر يعجبك في طياره
في مدحهم كرست الافكار تكريس = واخترت فيهم من جزيل العباره
لاذعذعت بالراس بعض النسانيس = وداعب جهازالفكر حرف الاثاره
وقام يتدفق من شموخ الاحاسيس = طاروق يفرض هيبته واعتباره
يستاهلونه مبعدين المراميس = والمدح ماهو باآل ماطر خساره