قم سو فنجال ٍ على الكيـف سـوّه=يطلق نظر عيني ويطرد اعماسـي
واحذر تطول البن ياسعـود ضـوّه=لاحمسـةٍ حرقـه ولابـه يباسـي
بالهيـل كثـر فيـه حـبـه وروّه=وبنّه ومـاه مقايسينـه اقياسـي
صبه على اللي يدركـون المـروّه=اللي تبيّن في السنيـن القواسـي
وعده عن اللـي مابقلبـه جـروّه=لاصار في بعض العلـوم إلتباسـي
واكتـب لنـا مبـداً بدينـاه تـوّه=فكري حظر عندي وهيّض احساسي
فكرٍ يصوغ اللعـب لاطـاب جـوّه=صوغ الذهب ماهو بصوغ النحاسي
ولاتوخذ الطوله من النـاس قـوّه=والبيت مايبنا على غيـر ساسـي
لاخان ساس البيت يطـرح علـوّه=والريح ماهـز الجبـال الرواسـي
بني رشيد اهـل الوفـا والحمـوّه=لاصار في دور الزمـان انعكاسـي
انشد وتلقـا فعـل كـل السمـوّه=يوم الحرايـب حدهـم مايداسـي
حنـا وطنـا مانجـامـل عــدوّه=دون الوطن فينا اندفاع وحماسـي
مساهميـنٍ فـي رخـاه ونـمـوّه=ونحميه من فتنة ارخومٍ اخساسـي
وعدونـا مـردود كيـده وســوّه=ليا إلتحلف بالكم خطـو الهداسـي
فعلـن قديـمٍ شـاع ماهـو بتـوّه=بين القبايل منـه مرفـوع راسـي
والناس فيهم مـن شجـاعٍ ولـوّه=ومن يكسب الطولات مافيه باسـي
وإلا مـرد النـاس لأدم وحــوّه=مافيه فـرقٍ بيـن كـل الجناسـي
إلا بتقـوى الله وتـبـع النـبـوّه=اللي ذكر ربـه بصبـح ومماسـي

بني رشيد اهـل الوفـا والحمـوّه=لاصار في دور الزمـان انعكاسـي