ياموطني تبقى زعيماً للاوطان = وتبقى بعين (الضاد) دره ثمينه
تبقى على طول المدى عالي الشان = وتكفيك (مكه) ياوطن (والمدينه)
ويانجد يادار العرب عبر الازمان = ياللي بمكنون الضماير سجينه
لك بالحروب انواع واشكال والوان = طول الزمان اللي تقفّت سنينه
يوم الرمك في سرج والجام وعنان = يوم الرجال احسابهم حاسبينه
للسيف مغوار(ن) وللعرش سلطان = وللحرب جولات ومواقف حزينه
للمعركه جيشٍ وللخيل فرسان = ولبطال حزتها سيوفٍ سنينه
ويوم امتطى صهوة جواده كحيلان = سارو ورى (عبدالعزيز) أربعينه
واستبشرو بالفتح يوم الوغى حان = يوم الزمن مابين زينه وشينه
(عبدالعزيز) اللي له الحرب عنوان = لا ولّعت سيفه بقبضة يمينه
عنده حياته واحمر الموت سيّان = للذود عن شعبه وعرشه ودينه
كنه الى منه نزل كل ميدان = العاصفه عقب الهدو والسكينه
مابين الارض ونجمة سهيل شتان = وشتان مابين الفوارس وبينه
وياموطني ماميّزك بين الاوطان = ياكود (مكه) ياوطن (والمدينه)