قبيلة بني رشيد - الشاعر حمد السعيد

http://www.mekshat.com/pix/upload/im...k1748_vd12.jpg
الشاعر حمد السعيد
شاعر كويتي شاب عشق المقناص والصحراء والوسم والربيع والبارق والمطر كأي شاب بدوي فهذا عشقنا وهذا ماجبلنا وتربينا عليه ..
لشاعرنا الشاب حمد السعيد الكثير من القصائد بالمقناص .وتميز شعر حمد السعيد بالعذوبة ووصفه الدقيق للطير لكثرة علاقته به وقربه لنفسه ..
اول قصائد الشاعر والتي سأعرضها عليكم من خلال هذه المشاركة التي سأورد فيها قصائد شاعرنا هي قصيدة الطلح ..والطلح هي شجرة ذات اشواك تنبت في الصحراء وكانت مناجاة وحديث شجن بين شاعرنا الذي يحاكي شجرة الطلح من خلال قصيدة رائعة وهو يسأل الشجرة عن طيره الذي فقده ...
بأسلوب سلس وشيق وفي نفس الوقت يبين لنا الشاعر حمد السعيد مدى العلاقة والحب الذي يجمع بينه وبين الصقر ..اترككم مع القصيدة
يالطلح مامرك مع الصبح صافي - طيرٍ غدا لي امس والشمس حيـه
اتلى العهد به راح يطرد مقافـي خبري به اوما في جناحه هنيـه
ورد الـطــلــح
لاوالله الا مرنا العصـر وافـي - كنـه غـلامٍ مستغيـر بهـيـه
اقبل علينا ثـم اخـذ بانحرافـي - يوم الحباري وقعـن لـه سويـه
قــال الشـاعـر
يالطلح قل لي عل مابـه خلافـي - البارحـه بـرد وشمـالٍ قويـه
كانه تعشى قلـت علـه عوافـي - والحي يجمعه الولي مـع خويـه
ورد الـطــلــح
لاوالله الا صاد خـرب متعافـي - واخذ عليه مـن الثنـادي شويـه
لامفلـسٍ مـره ولاقـال كافـي - يوم اخلفنه عـن عشـاه أعقبيـة
قــال الشـاعـر
خابـره والله قاطـعٍ مايخـافـي - دايم على الصيده تجي له حميـه
انشدك باللـي منبتـك بالسوافـي - عساه فـي خيـرٍ ولافيـه سيـه
رد الـطــلــح
خبري به اقرش في سبوقه خلافي - مابه بلا وامرح على هالحصيـه
والفجر شخّص بالنواظر وشافـي - طلعـه بعيـد ويمتـه ساحلـيـه
قــال الشـاعـر
يالطلح ذا حبـه ولاهـو بخافـي - متعـادلٍ حبـه بحـب البنـيـه
بعض الطيور ان راح قلنا عوافي - لاشك هـذا ويـن ابلقـى حليـه
رد الـطــلــح
اتعب عليه وعادت الحـر يافـي - اضرب سهلها والوعر والشقيـه
يجيبـه اللـي رازقٍ هالعجافـي - بهايمٍ تمشـي علـى غيـر نيـه
قــال الشـاعـر
يالطلح لك مني يابو غصن ضافي - لاجابـه الله وكـل نيـه مطيـه
لاجيك انا في موتر القش هافـي - واسقيك هاللـي باقـي بتانكيـه
وآطا على رملة سوافيـك حافـي - وكلٍ على ماقيـل يذكـر خويـه

للشاعر / حمد السعيد
http://www.mekshat.com/pix/upload/im...78_hmdd112.jpg
لم يعثر حمد السعيد على صقره وحزن كثيراً لفقده وكان كل مابتمناه ان يكون الطير في خير وشبعان وان البرد لم يؤثر عليه
وصلت قصيدة الطلح الى مسامع الناس عبر الصحف واللقاءات مع الشاعر حمد السعيد وسمع بها سمو الامير عبد العزيز بن سعود((السامر)) والامير عبد العزيز من عشاق القنص ومن عشاق طير الحر وتألم لاحساسه بمعاناة شاعرنا حمد السعيد وهو يناجي شجرة الطلح وينشدها عن طيره
واختار سمو الامير اطيب صقوره وارسلها الى الشاعر حمد السعيد لعله يعوضه عن صقره او يخفف بعضاً من معاناته ..
وكان لابد ان يسجل هذا الموقف لسمو الامير عبد العزيز بن سعود
وكانت هذه الابيات التي كتبها الشاعر حمد السعيد وهو يصف طيب سمو الامير عبد العزيز بن سعود من خلال دمج كل ذلك مع الوصف الدقيق والرائع للصقر ..
اترككم مع القصيدة لتستمتعوا

يالبازعي طيري طلع مثل راعيه = زولٍ وفعـلٍ والمـواري تشابـه
بالطلع موقف مالقى من يماريه =عساه يسلم سيدي يـوم جابـه
له ماكرٍ في بر فارس محاريـه =كني اشوفه يوم خاطـو اقطابـه
صفاة وجهه مع شـدوده توديـه =ضمن الحرار ولاوراها اااطلابـه
النادر اللي يوم عزمـت اسميـه =سميته (السامر) واشوفه زهابه
اليا قفيتـه شفـت دقٍ محنيـه =واليا نطحته من عيونـه تهابـه
كن الثريا في قواطـي مواميـه =ابيض نحر كنه يشع الضوا بـه
هجرٍ..قصير الساق..جبره ثناديه =وله عاتقٍ يعطي شموخ ومهابه
اليا مسح وجهه ونهض مواطيه =يطري علي اللي عزيـزٍ جنابـه
به من طبوعه مشبع اللي حواليه =وماخذ من طبوعه ليان بصلابـه
وجهه ليامن صاد يشبه محاليـه =لابشر بضيـفٍ وردد هـلا بـه
لاتل سبقه قلـت ياطيـر لبيـه =واقفى وكني كاسبٍ بـه ثوابـه
وجاهن وهو كن المنايا تباريـه =زيزوم قـوم وفزعـوه القرابـه
اللي معه بالطلع ماعـاد يمديـه =ياصل مطاليعه وهو مادرى بـه
من عادته برق الدواغر مداميـه =في صيدته الطير غمقٍ صوابـه
اليا ضرب ماوافق الضرب يفريه =كن بيمينه من سيوف الصحابـه
ينقى كبير العرف ماهـو يخليـه =من خيشت قدمه نهبهـا نهابـه
ياسعد عين اللي قنص عانيٍ فيه =طيرٍ وماخذ من طبـوع الذيابـه
لاصارت الدعوا عناد ومشاريـه =اخذه وكنك ماخـذٍ معـك لابـه
الطير احبه حيل من حب راعيـه =عبد العزيز اللي عزيـزٍ جنابـه

الشاعر / حمد السعيد