محاوره قويه بين الشاعرين فيصل الرياحي رحمه الله وحبيب العازمي
 

فيصل الرياحي

سلام ياهل الديار اللي عليها سـلام =حامينها أهل السيوف الحدب حامينها

الليله الملعبـه ماتعتـرف بالنظـام =وليا حضرنا تبى ترجح موازينهـا

حبيب العازمي

يامرحبا يارجال(ن) من ديار(ن) كلام =يازينها في ليـال الصيـف يازينهـا

الليله الملعبه تحتـاج ربـط الحـزام =وليا وقفنا نبـى نخـزي شياطينهـا

فيصل الرياحي

اليا خلطت السوالف من حلال وحرام =لكلمـه الثانيـه عنـدي براهينـهـا

ياحبيب اليوم خلك شعرة(ن) في سنام =والبـدو تلقـاك لاشـدت بعارينهـا

حبيب العازمي

أن جنبت في اللحم وأن وافقت في العضام =والكلمـه الثانيـه تاصلـك فـي حينهـا

ماني بشعره أناخصمك قطـوع العـرام =وان زاد جن البقـوم أحشـر مجانينهـا

فيصل الرياحي

أن وقعت في الصخر وان وقعت في العدام =حنا سيـوف المعـارك وأنـت سكينهـا

الله ربـي وربـك يامـطـوع جـهـام =تسجد علـى الأرض لاثـارت براكينهـا

حبيب العازمي

لو مامعي غير سكين ومطرق بشام =أخذ سيوف أكثر البقمى من يدينها

الله رب الجميع وصاحبي مايـلام =هجت ذلوله تلوى فـي كراعينهـا

فيصل الرياحي

كم عالم(ن) يحلمون ويشمتون الحلام =ماردك عـن البقـوم ألا سلاطينهـا

ترا هذيك الهنوف أم الذهب والزمام =ماعدك ألا قذاة(ن) في طرف عينها

حبيب العازمي

وين السلاطين يوم(ن) الشجاري خيام =هي بيض من طبعهـا ولا مكسينهـا

وأنته بعد في حدا الخدين دقت وشـام =لله يعينـك علـى الأيـام ويعينـهـا

فيصل الرياحي

شهد لنا بخيت يوم الهوش تحت العسام =ماهي بكذبـه مـع العبلـه مسوينهـا

عاملتها بالوفـا والطيـب والأحتـرام =وأنته تجمع على الخبـزه وراعينهـا

حبيب العازمي

شهادة طيبه لاهل الهوا والغـرام =قصيدتن كل خلـق الله مغنينهـا

ياصحابنا لايزيد الطق فوق اللحام= أنتـم مغدينهـا حنـا معشينهـا

فيصل الرياحي

أنتم كما الزرع ياعتيبه وحنا الصرام =لأرض ماعـاد تحماكـم ميادينهـا

ياشاعرن في الملاعب لبسوك الوسام =ضيعت في الليل عشرتها وعشرينها

حبيب العازمي

كلمتك هذي ماتنقص للنشاما مقـام =ياللي تهدد عتيبـه وينـك ووينهـا

يالشاعر اللي نبتلك مثل ريش النعام =ماصالحـن للبقـوم ألا دكاكينهـا

فيصل الرياحي

ندخل على الله ترانا مانسـب الكـرام =أقوللـي سالفـه مـاهـم بناسينـهـا

من يوم ركبت طوقن مثل طوق الحمام =حتى أم ضرفين جادينك على دينهـا

حبيب العازمي

السب ماله مجال ولايفك الزحـام =وأن جبتلك سالفه ميعادك دوينهـا

مايختلف هالرياحي منتفخ كل عام =كن أم ضرفين غاذيته بضرفينها

فيصل الرياحي

مزكوم ياصاحبي واعديتنـي بالزكـام =دينت بنت الحـلال ولا قضـا دينهـا

سبحان من حط جسمك مثل عود الثمام =كنك مـن أفريقيـا وأحـد مساكينهـا

حبيب العازمي

خلـه لعلـه عساكـم كلكـم للهيــام =العافيـه صـح منـتـم مستحقينـهـا

وزن الخشب طن ولا الماس كيلو جرام =حمـر الفلسطيـن نكبتهـا فلسطينهـا