قبيلة بني رشيد - فاحت معاميل الشعر يامتقهويه

فاحت معاميل الشعر يامتقهويه
جزل ٍ على ضو المشاعر حمسناه
فنجال فكر ٍ يقعد الراس ياهيه
معنى وقاف ٍ للجزاله طبخناه
نردف جزيل الطرق بعذب قوافيه
طرق ٍ يتل ارهيف العود وياه
ابيات شعر ٍ كايفات ٍ معانيه
اما نجيبه صح والا ،،، بلياه
ماجيب بريال ٍ ولاجيب بجنيه
لاخير فاللي ينفخ الشعر علباه
طبع ٍ على ماقيل محد ٍ يدانيه
راعيه من بد العرب ماقبلناه
وانا الحبيبي دايم الدوم اغنيه
لولا عيونه ماطرقته ايبلاه
من دم قلبي انظم الشعر واهديه
عليك ياباهي النحر واحلالاه
محبوب قلبي ياعرب ايش اسميه
كل الحروف الابجديه اتمناه
بايات حسن الكون ربي مسويه
سبحان من صور جماله وسواه
حتيش لو قلت بجماله ماوفيه
انا اشهدانه وافي ٍ في مزاياه
القلب لو يبعد دقايق يناديه
والشوق لو يبعد مسافات ناداه
حبه بقلبي والحدب من حواليه
ان راح عني راحت الروح وياه
وشلون مااحبه وانا ميت ٍ فيه
وشلون مااحبه وانا كلي افداه
بالمختصر اقولها له نعم إيه
انت اول انسان ٍ ترانا عشقناه

ناصر القريشي