ليه المسا عوق الشقــاوي وطبّــه ؟
............................وليه الهبـوب تصحـي القلـب لا بـات ؟
وليه القـمر يدعـي جريـح المحبّـه ؟
............................ويقول له : يا هيه .. ما فات .. ما مات !!
جرحـك ظهـر لو قلت : للوجه خبّـه
............................وللحـزن في ضحكك رسوم وعلامـات !!
وليه المطـر بالذات ريحـه .. وصبّه ؟
............................كنّـه رسـول بيـن الاحبـاب بالـذات !!
اشتـاق فيـه .. لشوفتـك واتنبّــه
............................للي نسيتـه !! من مواقـف ونظـرات ..
لا استانس الخافـق ذكَر من يحبّـه !!
............................ورجع يراجـع .. فالوناسـات ما فـات
يا مرتع القلـب الحزيـن .. ومربّـه
............................يزيـن بك مثل الذهـب .. صدر الأبيات
هيهات ينسـى القلب شخص ٍ لعبّه !!
............................وهيهات يدّله خاطـري منك هيهـات ..
نبع الغـلا عندك وعندي مصبّــه
............................ومن الولا .. في خافقـي لك .. ولايات
وطيفك حطب عيني .. وعيني مشبّه
............................والشوق بــرد ٍ ما انقطع لو لحظـات
ومكانك الصـدر ولك القلب شبّــه
............................بين الضلـوع .. اللي فردهـا التنهـات
ولك بيـرق ٍ فالقلب حبـك يهبّــه
............................شامـخ ولا هـّزه من العـذل غـارات
محبـتك فالوقـت ذا ؟ ما تشبّــه
............................الا بخيمـة بــدو .. بين العمــارات
ان شفتني ضايق واهوجـس واسبّه ؟
............................اخاف غـدر الوقت .. والوقـت دورات
لا تحسب ان دمعـي نزل دون سبّـه
............................ابكي من الفرقــا وهي مابعد جات !!
اليـوم كـل أمورنــا .. مستتبّــه
............................وبكره ماندري وش معه من مسـرّات
اربّ قلبــك . . مثل قلبــي اربّـه
............................ما يخلفـه كثر العـذل .. والمسافـات




للشاعر / محمد بن فطيس المري