يالله بنّو مدلهم الخيالا = طافح ربابه مثل شرد المها الزرق
لا جا على البكرين بنا الحلالا = ولاعاد به يفصل رعدها عن البرق
عساه يسقي ديرتي بالكمالا= ويودع نعام ديار الاجواد له طرق
يسقي غروس عقب ماهي همالا= يصبح حمامه ساجع يلعب الورق
لي حال أصبر من فرايد شمالا =واصبر من الريع الذي يدهجه طرق
جريت انا صوت الهوى باحتمالا =في وسط بستان سقته اربع فرق
وطبيت مع فرع جديد الحبالا =وظهرت مع فرع تناحت به الورق
روشن هيا له فرجتين شمالا =باب على القبله وباب على الشرق
ومبسم هيا له بالظلام اشتعالا= بين البروق وبين مبسم هيا فرق
برق تلالا قلت عز الجلالا =واثره جبين صويحبي واحسبه برق
حنيت انا حنت هزيل الجمالا =تنقل روي الخيل قد حسه الفرق
يا قلتتن في عاليات الجبالا =ما ها قراح مير من دونها غرق
ماعاد للصبيان فيها احتمالا =من كود مرقاها يديهم لها طرق
ياشبه صفرا طار عنها الجلالا =طويلة السمحوق تنزح عن الدرق
له ريق احلى من حليب الجزالا =واحلى من السكر اليا جا من الشرق
أخذت منها حبتين تتالا= يوم ان نسناس الهوى يطرقه طرق
قالوا تتوب عن الهوى قلت لا لا =الا تتوب رماح علوى عن الزرق
وقالوا تتوب عن الهوى قلت لا لا =الا يتوبون الحناشل عن السرق
وقالوا تتوب عن الهوى قلت لا لا =الا تتوب الشمس عن مطلع الشرق