قبيلة بني رشيد - وأقول لكل عرق فز خالي مايسويها...

على مبدا الرجال أفعال لاوالله مهـي بافعـال
هذاك أول نصيب المرجله من كـف راعيهـا

ولكن دارت الدنيا ومقيـاس الرجـال أقـوال
ويبقى الفعل عند أم العيـال الفعـل يزهيهـا

أقول لمن سألني عقب طاب الجرح كيف الحال
أقول الجرح باقـي والمواجـع فـي مفاليهـا

أنا بحكي لكم قصه تلاشـت بعدهـا الآمـال
قسم بالله لو طـال العمـر مانـي بناسيهـا

أنا لي خال قدمته على الادنيـن لانـه خـال
ولان الخال والـد والعـرب تنخـى بناخيهـا

حشمته وإحترمته حشمتن تظرب بها الامثـال
أحسب إن العروق تحن يـوم يحـل طاريهـا

كبرت ودارة الدنيـا ومقـداره كبـر مـازال
وكبرة بنتـه اللـي جـل سبحانـه مسويهـا

جذبني حسنه الطاغي ومنطوقه وطيب الفـال
ربـا حبـه بقلبـي دون قاصيهـا ودانيـهـا

على بيض النقى واجهت خالي قلت له ياخـال
أنا لي حاجتـن مـدة يدينـك وأنـت قاويهـا

تزهل قال يابناخي تراهـا لـك بـدون جـدال
ولو جاني سواك من البشر مانيـب معطيهـا

ركضت وقلت يمه باركي لي من تمنـى نـال
وروحي باركي لـه يمـه وتكفيـن ضميهـا

قعدت أحلم متى الملكه متى الزفه بنيت آمـال
إذا جا الليل أناجي طيفهـا وأسهـر بطاريهـا

ولكن يافقير الحظ حلمك خـان بـك ماطـال
تلاشة كل لحظه من حلوم(ن) كنـت بانيهـا

وأنا نايم صحيت من المنـام بنغمـة الجـوال
هذيك النغمه اللي من هـذاك اليـوم ملغيهـا

هلا يمه ورى صوتك كذا؟؟ قالت بصوتن عال
ترى البارح فلانـه خالـك لهـذاك معطيهـا

وقفت وكن جوف الارض تحتي ضاربه زلزال
وأقول لكـل عرقـن فـز خالـي مايسويهـا

مشيت من الدوام ونبض قلبي يسبق الاميـال
وجيت أمي ودمعات الحـزن عنـي تداريهـا

وش اللي صار يمه؟؟ دنقت راسه ودمعه سال
وقالت خالك أكرم زوجتـه وأكـرم بناخيهـا

مسحت الدمع من عين الحنونه قلت طاب الفال
نصيب ودمعتـك يمـه حـرام إنـك توطيهـا

فدا راسك جميع اللي على الدنيا مـن الازوال
أموت ألفيـن مـره بـس دمعاتـك تكفييهـا

سكت وقلت يالوم الرفيـق وشرهـت العقّـال
إذا غيري تـردى رافعـن نفسـي وحاميهـا

حسافه يالرجال اللي تسمـا بالرجـال رجـال
وهي شور الحريـم يردهـا تتبـع مباديهـا

مشيت ومـرت الايـام ياثقلـه تقـول جبـال
وأنا لاقلت ناسيها سهيـت وجبـت طاريهـا

وألا يامن سألني عقب طاب الجرح كيف الحال
ترى للحين قطعـان المواجـع فـي مفاليهـا