الطلح
 

يالطلح مامرك مع الصبح صافي
طيرٍ غدا لي امس والشمس حيه


اتلى العهد به راح يطرد مقافي
خبري به اوما في جناحه هنيه


ورد الطلح:لاوالله الامرنا العصر وافي
كنه غلامٍ مستغير بهيه


اقبل علينا ثم اخذ بانحرافي
يوم الحباري وقعن له سويه


قلت:يالطلح قل لي عل مابه خلافي
البارحه برد وشمالٍ قويه


كانه تعشى قلت عله عوافي
والحي يجمعه الولي مع خويه


ورد الطلح:لاوالله الا صاد خرب متعافي
واخذ عليه من الثنادي شويه


لامفلسٍ مره ولاقال كافي
يوم اخلفنه عن عشاه حقبيه


قلت:خابره والله قاطعٍ مايخافي
دايم على الصيده تجي له حميه


انشدك باللي منبتك بالسوافي
عساه في خيرٍ ولافيه سيه


رد الطلح:خبري به اقرش في سبوقه خلافي
مابه بلاوامرح على هالحصيه


والفجر شخّص بالنواظر وشافي
طلعه بعيد ويمته ساحليه


قلت:يالطلح ذا حبه ولاهو بخافي
متعادلٍ حبه بحب البنيه


بعض الطيور ان راح قلنا عوافي
لاشك هذا وين ابلقى حليه


رد الطلح:اتعب عليه وعادت الحر يافي
اضرب سهلها والوعر والشقيه


يجيبه اللي رازقٍ هالعجافي
بهايمٍ تمشي على غير نيه


قلت:يالطلح لك مني يابو غصن ضافي
لاجابه الله وكل نيه مطيه


لاجيك انا في موتر القش هافي
واسقيك هاللي باقي بتانكيه


وآطا على رملة سوافيك حافي
وكلٍ على ماقيل يذكر خويه



حمد السعيد

اخوي النمر

لاهنت على هذه القصيدة

ملاحظة : تكرار المواضيع في صفحة واحدة لاتخدمك ولاتخدم المتلقي اختصر موضوع واحد حتى يتسنى ويسهل الإطلاع عليه والردود وماقل دل نصيحة اخو وجهت نظر لمصلحتك لن المتصفح احيان لايجد الوقت لقراءة كل مواضيعك ويضعف الإهتمام اذا طرحت اكثر كن موضوعين وتلاحظ قلت الردود على المواضيع التي طرحت


محبك بالله



تحياتي

النمر يعطيك العاافيه

صح السان الشاعر حمد السعيد

ولاهنت على الاختيار الراائع

تحياتي لك