قبيلة بني رشيد - سلطان الهاجري وشاعر مجهول

الشاعر

مرحبا بضيوفنا اللي لفونا في القصيم ***** في عنيزة ديرة أهل الوفا وأهل الكرم
مايلبّي دعوة الأكرمين إلا الكريم ***** يالرجال أهل المواجيب عالين الهمم

سلطان الهاجري

والبقا بالشاعر اللي له إسم من قديم ***** كل مايطرونه الناس قلنا والنعم
ياصفوف اللعب هبّوا مع طرق النسيم ***** والزمان يلف ويدور رفرف ياعلم

الشاعر

كل راعي يرقب الله ويرقب كل غيم ***** لاذكر له مرتع ساق له حمر النعم
والشقاوي لو بغى ركعة عند الحطيم ***** كان صكّت دون وجهه مداخيل الحرم

سلطان الهاجري

الله إنه يرحم أبوك وأخوك العميم ***** كل أبوكم واقفين على ساق وقدم
درجّوها درجّوها ترى المولى كريم ***** وإطرق أبواب المعاريف يامال الشحم

الشاعر

لوحصل لي كاس بسكوت فيها الأسكريم ***** كان سليّت الشباري وسددّت السهم
الفشق في مجند الكتف وحزام البريم ***** مانجنّب دون قطع العراوي والوذم

سلطان الهاجري

المعاني مثل حدّ الصراط المستقيم ***** واللسان مانطق صح جعله للطرم
وأهل عنيزة يقولون وادي الهيم هيم ***** يالعميل المحترم يالعميل المحترم

الشاعر

المعاني ملك أبوي وجدي يافهيم ***** لاتحوّشها مثل ماتحّوش لك بهم
ماعليّ من تغطرسك وإذهب للجحيم ***** هاجريّ(ن) لو وزنّاك ميزانك هضم

سلطان الهاجري

مات أبوك ولابقى إلا أنت يالورع اليتيم ***** والمعاني عندها أهلها لها ذوق وطعم
هاجريّ(ن) لو يذّكيك والله العظيم ***** كان يلقى فيك دم مثل دم الحلم

الشاعر

خوفي المكيال وجاني فاضي ياغشيم ***** روح وإنصب في المرازيم وطقوم القلم
مطرب الحيّ الموالي ولو صوته رخيم ***** فالأذاني عن ترانيم نغماته صمم

اللي يعرف الشاعر لايبخل علينا