شي بقلبي يا محلا حايرن فيه= سي تحير ابه العقول الفهامي
مخفية بفوادي ولا ودي ابديه= وادور الخيرات شرقن وشامي
احترت به ماشفت شي يحاليه= واليوم ابنشد عنه ماني بكامي
سيل حدر مع وادي غير واديه= مدري حلال ماه والا حرامي
كانه حلال وجايزن شرب صافيه= وش حلله يا مفسرين الحلامي
هاتوا تفاصيله وهاتوا معانيه= نبي الدليل اللي عليه الكلامي
نبي دليل يفهم الدرب ماشيه = يمشي به التايه بليل الظلامي
يمشي به التايه ويقدي مواطيه= ويشرب قراح الما ليا صار ضامي
لا شك هجسي يوم خلا مماشيه= انه حرام ومنه زود الاثامي
احرم من الزقوم مره وحاليه= وشربه على الضامي يزيد الهيامي
الله من قلب همومه تقزيه = تدك به مثل الجراد التهامي
من ما جرى قامت تتله مشاحيه= تل الرشا من فوق هدف المقامي
روابع قامت تصيبه وتخطيه= شاف الهوايل واختلاف الاسامي
مايسمع الداعي اليا قام يدعيه= يعوم في بحرن من الهم طامي
ماينتبه للي بصوته يناديه= يزيد همه يوم كلن ينامي
يشوف وقت ما عرفنا تواليه= وقت يشيب من ابسن الفطامي
هذا زمانن كاثرات بلاويه= الغيم يقلب فيه عج وكتامي
يا بعد شرب الما على كبد راجيه= ماسيل الغبرا زعوج الجهامي
انبيك يا من كلمة الحق ترضيه= اعطيك ما ينفعك وافهم مرامي
قصرن يذلك لا تقابل مبانيه= خله عسى شامخ طويله هدامي
خله عسى ما صاب اغادير يفنيه= يودع منازله الطويله رجامي
لو زان مدخله وطالت حواميه= شيد على الخيبة قليل الرحامي
وحي يوريك المذله وتغليه= أنا اشهد انك ميت القلب عامي
ارفع مقامك عن عدوك وتوذيه= ويلحقك من تركت رفيقك ملامي
حق الرفيق وواجبه لا تخليه= يلزمك مثل الوالدين الحشامي
اختر عزيز الجار والحق يعطيه= شبل على هرج يقوله يحامي
مادك به عرج المذله وطاريه= يسبق على فعل الفظيله شمامي
ومن قارب الاجرب بالامراض يعديه= عدواه تسطي باللحم والعضامي
درب السلامه بيناتن مماشيه= ودرب العطب يرث عليك اللكلامي
ابعد وقلبك نازح البعد يشفيه= وتلقى عن الدار البغيضه مقامي
دارن بدار وداعي الذل عاصيه= ولا تقبل الذله نفوس الكرامي
الذل موت حايماتن ضواميه= ادخل على منزل فروض الصيامي
عن مقعد بالذل عينك تراعيه= الموت عند الذل امان وسلامي
يرضى المذله من تردت هقاويه= والذل يجفل منه قلب العصامي
والعبد له رب الناس يغنيه= ولولاه ما صاب الهدف كل رامي