يبقى الوفا لأهل النفـوس الخفافـي=اللي وفاهم من على عصر الأجـداد
رد الثنا واجـب علـى كـل وافـي=واجب على من يعرف اسلوم الأجواد

ما هي غريبة كان مبديك ترحيب =لو كان طــفــل في معــانيه رجـال
طفل ولكن ساس بيته من الطيب =عبسي رشيـدي حاتمـي بالافــعــال
جاها على الفطرة من غير ترتيب =سلّم وصافح ثم سالك عن الحــال
وأثنى عزيمة شايب غطه الشيب =كل السبب شايفك ضيـف ورحـّـال
هذي عوايد قوم فوق المراقيب =متوارثين الجــود جيل وراء أجيال
الساس عبسي والشهامة مشاريب =والدار حايل وين حلــوا بمــــنزال
بيت من العــزة وربعه مناسيب =عامـــوده النخــوة نهاته ولا مال
ما أقولها ألا من صميم التجاريب =أربع سنين بينت لي بلا جـــــدال
أقرأ على وجه الرشيدي مكاتيب =طيب النفوس اللي بها طيّب الفال
وإن حافها ضايم تعود مشاهيب=أحرار لا هدت على كل منــــوال
فيهم حمية فوق وصف الأعاجيب =هــذا ولــد عــم وهــذا ولــد خــال
والناس قالت خير صنف الأصاحيب =( خوّة رشيدي ) ضاربين بها الأمثال
هذي شهادة حق من دون ترهيب =ما أرجي وراها مكسب جنيه وريال
قول اسلميٍٍ عارف الشاه والذيب =يعرف عزيز النفس من بيــن الأنذال
جربت في الدنيا صنوف المذاهيب =اللـي بها صـدق المعــاني وتمثــال
يا مكثر اللي ما تعرف المواجيب =يصعب عليها من ردى مــدّ فنجال
وأنته حلال الجود خير المعازيب =ما خاب ظنّه يوم رحب بك وقال
فيك الوفا والطيب مكسبك ترحيب =من قدّم الخيرات يجزى بالأمثال