يامل قلبا تالي الليل منكــــــــــوب =والهم من بين المعاليق ساقــــــــه
همن يسوق القلب للقلب مكتــــــوب = واللي كتب للبعد صعب انفراقـــه
لولاه من بين الصناديق مقضـــــــوب = خطراً على ضلوعي من الاصطفاقـه
على الذي من جملة البيض مرغــوب = اللي لغيره ما نويت الصداقــــــه
كن العسل من بين اشافيه مصبـــوب = لاواهني من بين اشافيه ذاقـــــــه
لاهو متين ولا من الحال مسلــــــوب = موسطه لا جلاله ولا دقاقـــــــــه
ودي عليهم ود من طاح مصيــــــوب = غصباً عليه اخذت قلايع انياقـــه
في ديرتاً ما بين ناهب ومنهـــــــوب = لو صاح صوته ما سمعوه الرفاقـــه
خلوه فوق الارض طايح ومكبــــــوب = متشفقاً شوف الأوادم شفاقــــــــه
وانا بحبك ياهوى البال مغصــــــوب = مجبور في راع العلوم الرقاقـــــــه
واجهتهم صدفه وانا لي مطلـــــــوب = قلت انت وش رايك نذوقك ذواقه
قال ابك انا اتعالج وهالحين محجوب = وكانك مكذبني خذ اقر البطاقـــه
واليا انتهى علاجي عليّ الك ماجوب = حسيبه الله كان ما قال باقـــــــه
تسعين يوم اللي صبرناه محســـــوب = لاوهو بشر غيره قطعت العلاقــــه