قبيلة بني رشيد - مسابقة مسيرة بطل رقم 1 (الفارس قاسم ابن براك)

بسم الله الرحمن الرحيم

رواد شبكة بني عبس الكرام

السلام عليكم ورحمة الله وبركاته:-

سيتم اقامة مسابقة مستمرة لمدة طويلة بعنوان (مسيرة بطل)
تتجدد المسابقة كل شهر مع فارس جديد بها نتذكر ابطال من قبيلة بني رشيد لهم صولات وجولات.
ويعتمد الفوز بوسام كل جولة على المعلومات المكتسبة من كبار السن او الرواة والمصادر الغير موجودة على النت.
سيتم جمع كل المعلومات ويتم وضعها بمكتبة خاصة بالرئيسية مع ذكر الفائز بهذه المسابقة ومنحه وسام.

الهدف من المسابقة :-

ابراز فرسان قبيلة بني رشيد للباحثين 0
حفظ مواقفهم المشرفة والذي من واجبنا ان ندونها0

ونرجو من الجميع المشاركة واضافة مالديهم من معلومات فنحن نحتاج الى اية معلومة ولوكانت صغيرة0

قصص - اشعار - مواقف - غزوات -

فارسنا الاول بهذه المسابقة يمتاز بالصفات التالية:-

الشيخة ، الفروسية ، الشاعرية ، الصدق ، الوفاء ، الامانة ، العفو عند المقدرة ،

http://www.bani-3abs.org/pp/uploads/a6bebb1075.gif

الشيخ / قاسم ابن براك شيخ قبيلة بني رشيد رحمه الله

المعلومات المتوفره عن بطل هذه الحلقة قاسم ابن براك رحمه الله

قاسم بن رشدان بن راشد بن براك الرشيدي

من مواليد 1222 هجري

تقريباً في قرية النبوان التاريخيه الواقعه في الزاويه الشماليه

من حرة عبس( حرة بني رشيد الآن )

المؤسس لعزوة البويضا وهو اول من أدب اقوى الخصوم

لقبيلة بني رشيد في سنة1265 هجري بعد حرب المويه سنة 1228 هجري

وأول من قيل فيه شعرا من شيوخ العشاير الرشيديه قبيل1265 هجري

بعد عام1228 هجري وأول من أستنصر فيه من شيوخ قبيلته

ناهيك عما خاض حروب يطول الشرح فيها

هذا وقد انجب من الأبناء خمسه وهم دليم وفديغم وغلاب وسويد وماجد

((( وقفات متفرقه عن بطل الحلقة)))
---------------------------------------------

قام الشيخ والفارس قاسم بن براك في إحدى مغازيه أخذ إبل الدياحين من مطير و إبل ابن عصاي من الروقه و في عودته صادفه الفارس المشهور العقيد ضيف الله بن عميره الروقي فرد الإبل و أخذ الإبل بعض الجيش وفى هذه المناسبه يقول شاعر من بنى رشيد يصف ماحصل فى المعركه.

امس الضحى جينا بطرش الدياحين = وذويد ابن عصاي مرذي الهجين
و اولاد روق اللي على الحرب عاصين = قدامنا فوق البرك محتسين
اللي ذبح منا ثلاثة و عشرين = غير الصويب اللي يجر الونين
يا ذيب لا تاكل لحوم المسمين = جنب طنف وربوعه الغانمين

ويقصد الشاعر بطنف هو اخ لشيخ قاسم البراك

-------------------------------------------

أسر في احد المعارك الفارس قاسم بن براك وخلف بن ناحل أمير الأحامده من حرب ويقول في ذلك جهز بن شرار:

خلّو زبون الجالس العدمليه=قاسم عقيد اقطاع بدوٍ منيسين
وخلف ربيع الضيف والاهليه=عيد القوايا اللي على الزاد شفقين

-------------------------------------------

توفي الفارس قاسم ابن براك في محرم 1319 هجري في معركة شريفاء الشهيرة بين قبيلة بني رشيد وقبيلة عنزه وحداثها كالتالي:

تعتبر عزوة اشريفا رمزاً من رموز البطولات والأمجاد والأنتصارات لقبيلة بني رشيد ذائعة الصيت ومهد الشجاعة وا لإقدام ارض الكرم والسخاء، قبيلة النخوة واكرام الجار قبيلة التلاحم والتضحية عاصمة الشعر وسيدته.

* اسم المعركة: معركة اشريفا او يقال ايضاً نقرة الدم وتسمى ايضا صبح اشريفا وقعت في محرم 1319 هجري بين قبيلة بني رشيد من جهة وقبائل عنزة وحلفائها الشرارات وجهينة والبلوات من طرف اخر.

*مكان المعركة: منطقة اشريفا وهي مابين بيضاء نثيل ووادي سبط وهي هضبة في منطقة تقع بحدود 150 كم غرب حائل يحدها من الشمال جبل ساق ومن الجنوب الأبيتر ومن الغرب سلسلة جبال المسمى.

قادة المعركة:- قائد بني رشيد الشيخ العقيد/ قاسم ابن براك شيخ شمل بني رشيد.
قائد عنزة العقيد/ عسكر العواجي ومعه ابنه الفارس مشعان بن عسكر العواجي ومن معه من قادة وفرسان القبائل الاخرى واشهرهم واكثرهم فروسية ((عيال الغزلان)) من خيرة فرسان قبيلة الشرارات.... كذلك القائد الشيخ/ فرحان بن بدر الأيداء.
* اسباب الحرب: كانت قبيلة بني رشيد تسيطر على أرض شريفا وهي ملك لقبيلة عنزة وحاولوا استرجاعها لفترة طويلة من الزمن دون فائدة، حتى لجأو الى التحالف القبلي مع قبائل بلي وجهينة والشرارات،ثم قامو بمهاجمة بني رشيد بعد الفجر وهذا يظهر مدى تعطش قبيلة عنزة لإسترجاع أرضهم من بني رشيد، لكن ذلك لم يحدث ودارت الدائرة على قبيلة عنزة وتحالفها فوقعوا في أبشع صور الهزيمة، وقد بدأت المعركة الفجر وانتهت بعد المغرب......... بلغ عدد القتلى من قبيلة عنزة اكثر من 99 فارساً ومن قبيلة بني رشيد عدد لايتجاوز أصابع، وفي هذه المعركة تم أسر شيخ عنزة الشيخ الأسطورة فرحان بن بدر الأيداء العقل المدبر لهذه المعركة وهذا يتضح في قول الشاعر

: كم واحد من شور فرحان كد مات= هذا صويب وذاك ينقل عطيبي..........

بعد ذلك تم اطلاق صراح الشيخ فرحان الأيداء بعد وساطة قام بها الفارس ثامر بن سعيدة القلادي، وايضا ان هذا الفعل من عادات العرب الأصيلة حيث لايقتل اسير الحرب ويعامل معاملة خاصة، وقبيلة بني رشيد اكثر القبائل فهم بالأعراف والأصول.
ويصف الرواه وهم من الطرفين واغلبهم شعراء المعركة انها أشرس المعارك والحروب في تاريخ الجزيرة العربية وذلك لعدة اسباب نذكر منها:
1_ انها تجمع أعرق وأشرس القبائل بني رشيد وبني وائل اضافة الى حلفاء عنزة
2_أنها استمرت يوم كامل أستخدم فيها السلاح الأبيض من سيوف وخناجر ورماح.

بعد هزيمة عنزة وبعد مرور فترة من الوقت يقول الشاعر الجويعان العنزي وكان احد الفرسان الذين شاركو بالمعركة،يصف ماحدث لهم على لحن الدحة وكان ذلك في حفلة زواج بعد المعركة بفترة ليست بالطويلة

ماشفتي يمال النجم= كيف يهجمونا هجم = ثناهم ماأجحد ثناهم.... ماتريد الخيل ملاقاهم.. شطيرين عيون ويماني= خيلنا للتالي فضت وخيلهم للأبرق حضت= ويلي من عيال الرشيدي..

ثم يصور هذه المعركة أحد أشهر الرواة المعروفين كيف لا وهو الذي قد شارك في هذه المعركة وساهم في تحقيق النصر لقبيلته بشجاعة واقدام....
الشاعر/ عتقى بن داموك الرشيدي يصور المعركة في قصيدته الخالدة المسماة ب ((الشيخة))

بديت في ذكر الولـي قبـل الابيـات=من قـدم المولـى فهـو مايخيبـي
جانا معشي الضيف بالجمع زافـات=واخوات بقشـة منحزيـن الحريبـي
جمع جهينه مـع بلـي والشـرارات=مثل التهامي يـوم شمسـه تغيبـي
يشدون دكات الدبـا جـوك زافـات=والاضـلامـآ دك روس الجذيـبـي
تشاوحونـا تقـل مقهـور خلفـات=وردوا عليهم منغصبيـن الشريبـي
بني رشيد من الظفـر جـوك ردات=الكـل يفـدع مثـل حـر قضيبـي
مسبليـن ارواحهـم بالصعيـبـات=دون المعـور وامهـات الحليـبـي
ولا لي حسايف غير عود(ن) لنا مات=وثراه عنده مثـل قـرط الخشيبـي
ولا حصلوا منـا صمايـل وفلحـات=إلا طيـاح القـش ماهـو مثيـبـي
كم واحدآ من شور فرحـان كدفـات=هذا صويـب وذاك ينقـل عطيبـي
تسعه وتسعيـن المدالـي المهمـات=اللـي وطينـا طايحـآ بالشعيـبـي
فيهم سباع شريفـه اللـي هزيـلات=مربـعـات وناشيـاتـن بطيـبـي
تاخذ عليهم ضبعة الضلـع كيفـات=والطير ياكل ليـن شمسـه تغيبـي
ماياكـلـن الاالفـطـاح العـذيـات=اللـي مـن الويـلان عيـا يهيبـي
حتى انت يافرحان عقنـاك بالـذات=عقناك وانته فـوق زيـن الهذيبـي
مشعان كبـك فـي نهـار الملاقـات=وهزاع واللـي يدركـون المصيبـي
راحو على قحص المهار العريبـات=خلوك يافرحان عشـى كـل ذيبـي
حريمهم يـوم المكاسيـب كرهـات=الكل تعـول مثـل خلـج العزيبـي
ياكم هنوفآ عقب لبـس الحمـارات=على شهود الصبـح تقنـب قنيبـي
دليم غايـب والنقـا فيـه عـادات=لعل قـول الشيـخ فيكـم مصيبـي
ابـن سعيـده عتقـك بيـن لمـات=عيـا عليـك الله ودمـك مريـبـي
في ساعة للمـوت حليـا وشـارات=لولاه لـو صيحـت مالـك مجيبـي
مايستوي للموت نفوس(ن) كريمات=ياللـي بلـوذات المساعـر تطيبـي
بالقول وحنـا مانـدور ل.ضيفـات=تحط مع هبـر العـداوي عصيبـي

هذه ابيات لشاعرمن شعراء عنزه

ثلاث رادت علـى العسـر والليـن=والرابعـة مــا رد الأول لتـالـي
وش عاد لو فـي كـل ردة ثلاثيـم=ماصابنـا دون الجهامـة جفالـي
ولو طاح دون الشيخ تسعة وتسعين=وردوا مبيعـة العمـار الغـوالـي

وقال الشاعر بن عبار من عنزه

من عزوةٍ يثنـون يـوم الحرابـه=نطيحهم يقفى من الطعن مسـرود
في ساعة والسيف يقطر انصابـه=والجو يقدح حبه عباريـد بـارود
بني رشيد اللـي تفـك النشابـه=من سبهم حظه ضعيفـاً ومقـرود
يوم الفعول او يوم دور المجابـه=دور النضا والشلف والخيل والقود
بعصور من حث المطايا ابعقابـه=كلن هجينه ساريا العقـب ملكـود
كم خيرا صنديد ما ينصخـا بـه=مقدام غوش ولا بساً جوخ ما هود
رموه يوم العـج يسمـك ضبابـه=دوار صيد و بينهم صار مصيـود
عقب العيا خلوه يشكـي صوابـه=من عقب ما هو صايلن عاد ملهود
يوم انثنا يشمت شويـرا غزابـه=يبا القطيع و لاخذا منـه مفـرود
عقب الطمع صار الغنيمة ركابـه=وانكف معيف او حالفاً دين ماعود

وقال ابن عاصي ابن عطران

يامزنة غـرى غشاهـا كتامـة=على (شريفة) هلهلت تقل ربـان
سيل عروم وطم روس العدامـة=وردو سنا سيلة طويلين الأيمان
اللاش طاح وقال مامن سلامـة=واللاش سب اليوم غيبات الأذهان
العـود مايلحـق علينـا ملامـة=ليته تحلى يوم حس الثرى كـان
ياما ذبحنا واحـد مـن جلالـة=من ربع مشعانن ومن قوم فرحان
وابن كحيل اللي تجينـا علامـة=اللي على سور المناكيف عنـان

وقال الشاعر سميرالبراك :

جانا العواجي حاذفن تقـل جالـي=يوم ان ربي دعثره طاح بالظبـق
جانا وجينـاه الظحـى بالعيالـي=صكت مكن ماهي بكـل التوافيـق
يوم انتحى المظهور واقفى الحلالي=ساروا عليه اقروم ربعي هداليـق
وبن سويلم شاف ظيـم الليالـي=بيته غدى بيمان ربعـي شوايـق
جا الهندوان ومحجـره والدلالـي=مع راس محقانن على فكة الريـق
وهذا السرى والا ترى العمر بالي=والعمر ماهـو دايمـن للمخاليـق

وقال أيضا :

بديت ذكـر الله عزيـز الجلالـي=الواحد الماحـود عـلام بالغيـب
يامزنة غرى نشـت مـن جبالـي=تزي من الروضة اليا ادنى زواجيب
على شريفة هلهلـت بانهشامـي=قامت تقرط مثل حـذف اللعابيـب
والشيـخ فدينـاه تسعيـن غالـي=وابن كحيل اللي يذكر بـه الطيـب
ما شفت الأيدا في يد القوم مالـي=من كفكوا خان العيون المعاطيـب
حلفـت يامـن عقبهـا مايوالـي=مخلاص من قفى ولالـه مطاليـب

ويقول عايض الابيتر الجلادي مخاطبا شخص من عنزه

وش انت خابر يوم كاين النعيمين=بيمن ((شريفه)) يوم سالت دماكم
جيشك(............) قضينابه الدين=رحتو كما الحنشل وخذنا حذاكم
بني رشيد اللي تضد المعادين.= اولاد عبس وفعلهم مايخفاكم

ويقول معلث المقوعي مخاطبا ابن عبار العنزي:

الله يعرضك الوشا يابن عبار.=من يوم ماوايقت الجبال الطويله!
ماشفت ((بشريفه)) قراطيع الامرار!=ولا تجوز وتترك الهرج طيله!!!!
ماشفت يوم عج الرمك ثار!!!!!= خلت على ((الويلان)) جوله دبيله
من سبنا ماكنه الى ذنب فار=والمعتدي نلعن ثوى جيل جيله!!

------------------------------------------------------------------------

قال أحدى شعراء قبيلة عنزة هذا القصيده وهو يسندها على الشيخ

قاسم بن براك شيخ قبيلة بني رشيد حينما هجمت عليه غاره واخذت

أبله وعرف العنزي أن القوم الهاجمه عليه من قبيلة بني رشيد

وكسبوا الأبل منه وذهبوا بها ولكن صاحب الأبل له عاني مع الشيخ

جاسم بن براك وذهب صاحب الأبل الى الشيخ جاسم بن براك واخبره بذلك

وأمر الشيخ قاسم البراك أن يؤدي عليه حلاله كاملا من غير منقوص

واستلم أبله كامله ولكن بعدما أتجه صاحب الأبل الى أهله فقد العبأة

أى البشت وبعد مده ارسل هذه القصيده للشيخ جاسم يطلب بها تأديه

البشت ويقول بهذه الابيات موضحآ بها للشيخ جاسم ومحرضٍ على من أخذ

البشت والشاعر لا أعرف أسمه ولكن الطاعنين بالسن من بني رشيد روولى

هذه القصائد قصيدة صاحب الابل العنزي ومردالشيخ جاسم بن براك عليه

ويقول الشاعر العنزى محرضٍٍ الشيخ جاسم بن براك على من أخذالبشت .

يا راكب من فوق منبـور الاوراك=حر مرمـل لـه ثـلاث سنواتـي
حرٍ على قطع الفيافي هـو أمنـاك=أشقـر حمـر ذرعانـه مفتلاتـي
أشقرحمرمنصاه بيت أبـن بـراك=من دون جاسـم راكبـه لايباتـي
من دون جاسـم لاتوانـا بممشـاك=ستـر العـذارا ناطـح الموجباتـي
كز القعودونصـه الشيـخ ملفـاك=وأشرحله الموضـوع باللازماتـي
يابو دليم أنخي الولى ثـم أبنخـاك=بالله ياهل الطيـب هاتـو عباتـي
بالله ياهل الطيب يازين من جـاك=زبن الدخيـل ومحتمـا الجاذياتـي
زبن الدخيل ليا وصـل لاذبحجـاك=عنها الايديـن الطايلـه قاصراتـي
ومن تطلبه حـق وبالحـق عيـاك=مايطاوع الاعقب ضرب الهواتـي
مايطاوع الاعقـب شدتـك يمنـاك=بالسيـف والالـكـزت باللهاتــي
والحق ماعنـه المشاكيـل تنخـاك=ان كان ارجالك تنطـح العايلاتـي
ان كان وتحدهم صميدع ونشمـاك=يودع سرب خيل المعـادي شتاتـي
وانت الذي ترد على حوض الأدراك=وان قمت فيها بحيـل ألالـه تاتـي
أن قمت فيها قومت مابها أشكـاك=تفـك عسـر قفولهـا المغلقـاتـي
ومن عقب مندوبي تراني أتحـراك=وانتم كعام اللى على الحـق عاتـي
وأنتم كعام اللـى بجمعـه تهقـواك=ياأهـل البويضـا فعولكـم بيناتـي
ودليم وفد يفـم عيالـك وشـرواك=نسل الفهـود مطوعيـن العصاتـي
وتمت عسا سهوم المنايـا تعـداك=واللى بوجهك مـا عليهـا فواتـي

وبعد ماوصلت القصيدة الشيخ قاسم غضب غضباً شديد لأنه لم يعلم عن البشت أى

عباة راعي الابل وأقسم بالله أنماوجدت العباةعند الذي أديه منهم الابل ان يكون خسرها

ناقه وضحا من ألابل الوضحا ناقة يعني بيضاء اللون ورد الشيخ قاسم هذى القصيده مطمناً

صاحبه بها أن لابد ان لايدير لها بال وان توصل باذن الله وقال الشيخ قاسم بن براك

((وأن كان ماجتكم خسارة حياتي))

بديـت بمديـر الهبـايـب الأفــلاك=دام الحيـاة وقبـل حتـنـا لممـاتـي
حي القعود اللـى لفـا نصـو منـاك=معـه بيـوت مـدرجـه مبهمـاتـي
ومن جيته باقصى الحشى صار ضحاك=وعيـت عيونـي تهتنـي بالمبـاتـي
ازريت اهيدوبالحشـى صـار دكـاك=وقعـدة أطمـن ضيقتـي بسعـواتـي
واعرف يابن وايـل ترانـا مننسـاك=وأنتـه ورامـا أسرعتلـى بالوصاتـي
وراك ماعجلـت وابديـت شـكـواك=وبمثل هـاذي عيـب فيهـا السكاتـي
وان كان ماضيعتهـا بـراس مفـلاك=فـي شايـت الله ياعبـاتـك لتـاتـي
في شايت الله غير تاتي علـي امنـاك=بحـق لــزوم مـابـه معاكسـاتـي
بحـق لـزوم رابـط ذاك مــع ذاك=وهـاذي سلـوم جدودنـا الاولاتــي
هذي سلـوم جدودنـا قبـل غبـراك=نمشـي علـى سلوملنـا جاريـاتـي
مير انت لاترسـل وتتعـب مطايـاك=ظمايـرى مـن جيتـك محرقـاتـي
ولونـي ابطـي لاتقولـون ماابطـاك=وان كـان ماجتكـم خسـارة حياتـي
عنهـا نبـي ننشـد هــذولا وذولاك=يامـن ذكـر يـوم الأخيـذ العباتـي
يامـن ذكـر ذكـر ولأبـه تشـكـاك=وانشـر لـه البيضـا وارز البراتـي
وان كان جحدت وهو يقول أنا أنخـاك=ادوا علـى ونجحـو لــى عبـاتـي
أقـول راحـت فدوتـلـى وتـفـداك=وأقـول تاتـي لـو بضـف الزناتـي
تاتي بسلم وطيب وبحسـن الاسـلاك=عند عضـداي وهـم سيفـي حماتـي
وان كان فيهم رايـك الطيـب كفـاك=لايثـور ونـك مكثريـن الشمـاتـي
لايثورونـك يودعـونـك بشـربـاك=ولا تستمـع هرجـت هبيـل يهاتـي
السـد كنـه كـان هالعلـم يـقـراك=وخـل العلـوم طوالهـا قاصـراتـي
اما تجـي بشتـك وملبوسـك اكفـاك=ولا العوض وضحـا ظهيـرة فتاتـي
تاتي عوض بشتك ان كان الله احيـاك=مخسورها مـن وضحـن مدعجاتـي
وحنا علينـا تتعـب النفـس برضـاك=وياتـي بيـاض الوجـه علـم ثباتـي
والحر صـاد وصـار للحـر شبـاك=واللـى شبكـه سلومـنـا القايمـاتـي
لـولا السلـوم القائمـه كـان ننفـاك=ومن عندنـا مـا راحـن المرزماتـي

هنا تكشف القصيده عن نفسها وتفاصيل القصه

ومعنا كلمة (المرزماتي) هى الأبل النوق

--------------------------------------------------------------------

هذا ماتم جمعه من بعض المصادر عن الفارس المشهور قاسم ابن براك راع البويضا

وننتظر اضافاتكم الذي بلا شك راح تفيد هذا الموضوع